دہشتگرد آک شونداری نا عمل ءِ توننگ خوارہ،چیئرمین سینیٹ

اسلام آباد : چیئرمین سینیٹ محمد صادق سنجرانی بلوچستان نا علاقہ بولان اٹی مروک آ دھماکہ نا ترند انگا لوز آتیٹی مذمت ءِ کرینے۔ سینیٹ سیکرٹریٹ آن جاری بیان نا رداٹ چیئرمین سینیٹ دھماکہ ٹی چندی کارندہ غاتا شہیدی آ ڈکھیائی و است ہسونی نا درشانی ءِ کرسا پارے کہ دھماکہ ٹی ٹھپی مروک آ سیکورٹی کارندہ غاتا زوت دراخ جوڑی کن دعا کیوہ۔ چیئرمین سینیٹ پارے کہ دہشت گرد آک شونداری نا عمل ءِ توننگ خوارہ ہراٹی او اسُل سرسہب مفسہ۔ دہشت گردی نا برخلاف جنگ اٹی پاکستان نا سیکورٹی فورس آک بے مٹ قربانی تسنو۔ ڈیہہ انا امن کن فورس آتا قربانیک زیان مفسہ۔ چیئرمین سینیٹ محمد صادق سنجرانی پارے کہ لغوری نا تخریبی کارروائیک ملک انا امن وایمنی ءِ لتاڑنگ کپسہ۔ پاکستان نا فوج ملک اٹی دہشت گردی نا ناسور ءِ چٹفنگ کن سنبرینگوک ءِ۔ دہشت گردی اقوام عالم کن اسہ چیلنج اسے ہرانا توننگ کن اسیجائی لائحہ عمل اس المی ءِ۔ ڈپٹی چیئرمین سینیٹ سینیٹر مرزامحمدآفریدی، قائد ایوان سینیٹ سینیٹر اسحاق ڈار، قائد حزب اختلاف سینیٹ سینیٹر ڈاکٹر شہزاد وسیم ئسک ہم بلوچستان اٹی مروک آدھماکہ نا ترندی اٹ مذمت ءِ کرینو۔

(اے پی پی)