دھماکہ ٹی ٹھپی مروک آتا درمان ءِ پک کننگے، عبدلخالق شیخ

کوئٹہ : انسپکٹر جنرل آف پولیس بلوچستان عبدالخالق شیخ، کمانڈنٹ بلوچستان کانسٹیبلری، ایڈیشنل آئی جی چوہدری سلمان و ڈپٹی انسپکٹر جنرل آف پولیس کوئٹہ کیپٹن (ر) غلام اظفر مہیسر سبی دھماکہ ٹی ٹھپی مروک آ بلوچستان کانسٹیبلری نا ورنا تا سی ایچ ایچ ہسپتال کوئٹہ ٹی جانپڑسی ءِ کریر و ٹھپی مروک آ ورنا تا حال احوال ءِ کرسا پارت کریر کہ ٹھپی تا درمان اٹ ہچ ءُ ڈیوالئی اس سگپنہ۔ ٹھپی تا بہبود کن کل درکار آ وسیلہ غاتیان کاریم ہلنگک۔ داوڑ نا بزدلانہ غا کاریم تیان ورنا تا حوصلہ غاک شیف مفسہ۔ داکان بیدس بلوچستان پولیس اٹ تینا فرض آتے جوان ادا کرسا ریٹائر مروک آ کارندہ غاک ننا سرمایہ غاک ءُ۔ پولیس فورس نا کارندہ ریٹائرڈ مریرہ ولے اوفتا رشتہ فورس اتون گنڈوک مریک۔ دا خیال آتا درشانی ءِ آئی جی پولیس بلوچستان عبدالخالق شیخ اینو آئی جی آفس کوئٹہ ٹی ریٹائر مروک آ افسر و کارندہ غاتا اعزاز اٹ سفاروکی پارٹی اسے آن تران کرسا کرے۔ آئی جی پولیس بلوچستان تینا تران اٹ مستی پارے کہ ریٹائر مروک آ ملازم آتا بہبود کن جتا جتا پراجیکٹ آتیا کاریم برجا ءِ۔ ہراٹی تعلیم آن ہلیس جانجوڑی و ایلو زند انا گرج آتیٹی اوفتے کن آسانی ودی کننگ نا کوشست کننگ انگ ءِ۔ ریٹائر ملازم آتیکن سی پی او نا دروازہ ہر وخت ملوک ءِ۔

(آن لائن)