دہشت گردی تور مذاکرات نا چارمی دور،پاکستان و امریکہ نا دہشت گردی نا برخلاف کمکاری ءِ پین سوگو کننگ آ امنا

پاکستان و امریکہ دہشت گرد ٹولی تا برخلاف کمک ءِ پین سوگو کننگ آ امنا کرینو۔ دفتر خارجہ نا رِد اٹ واشنگٹن اٹی پاک امریکہ دہشت گردی تور مذاکرات نا چارمی دور اٹی ہڑتوم آ ملک آک سیمی سیکورٹی ءِ سوگو کننگ و دہشت گرد آتا کمکار نیٹ ورک آتا چٹفنگ آ گپ وتران کریر۔ ہڑتوم آ ملک آتا نیام اٹی مذاکرات نا کماشی ءِ امریکی کوآرڈینیٹر برائے دہشت گردی تور و پاکستان نا وزارت خارجہ نا اسپیشل سیکرٹری کریر۔ اسیجائی اعلامیہ ٹی پاننگا کہ ہڑتوم آ ملک آک دہشت گردی تور نا بشخ اٹی کمک ءِ پین بھرمی جوڑ کرسا ڈیہہ اٹی مریس مُدی امن، سوگوی و شونہالی نا اسیجائی وژن ءِ مونی دیرہ۔ ہڑتوم آ ملک آک ٹی ٹی پی، بی ایل اے و القاعدہ تون اوار ایلو ٹولی تا برخلاف اسیجائی کارروائی برجا تخنگ نا عزم انا درشانی ءِ کریر۔ سرجم حوال آتا رد اٹ امریکہ و پاکستان نا نیام اٹ دہشت گردی تور مذاکرات نا چارمی دور واشنگٹن اٹ اڈ ہلک۔ چارشنبے نا دے آدفتر خارجہ نا رداٹ امریکی ڈل انا کماشی ءِ دہشت گردی تور اکن امریکی کوآرڈینیٹر گریگوری لوگرفو وخت اس کہ پاکستانی ڈل انا کماشی ءِ وزارت خارجہ نا اسپیشل سیکرٹری نبیل منیر کرے۔ مذاکرات اٹ پاکستان و امریکہ نا نیام اٹ دہشت گردی تور انا نا بشخ اٹ شریداری نا بابت اسیجائی فائدہ و دہشت گردی نا مون ءِ توننگ نا ہڑتوم آ ملک آتا عزم انا درشانی ءِ کننگا۔ ہڑتوم آ ڈل آک ساڑی دہشت گردی نا خطرہ غاتا حالیت آتیا گپ و تران کریر، تین پہ تینی کمکاری ءِ پین گچین کننگ نا گمان تا جاچ ءِ ہلکر و سیمی سلامتی ءِ سوگو کننگ تون اوار اوار دہشت گرد آتا کمک و کمکاری نا نیٹ ورک آتے چٹفنگ نا گام گیج آتیا ہم گپ وتران کریر۔ ہڑتوم آک دا اسیجائی عزم انا درشانی ءِ کریر کہ او ہمو دہشت گرد تنظیم آتتون پبی مون ایترہ ہرا ہڑتوم آ ملک آتا شاری تا سلامتی و ڈیہہ انا سوگوی کن خطرہ ءُ ہرافتے ٹی داعش خراسان، القاعدہ، تحریک طالبان پاکستان، بلوچستان لبریشن آرمی و اوفتتون تعلقدار ٹولیک اوار ءُ۔ ہڑتوم آ حکومت آک دا ہیت انا ہم درشانی ءِ کریر کہ اوفک ہڑتوم آ ملک آتے رکھ و پرامن جوڑ کننگ کن دہشت گردی تور انا بشخ اٹ تین پہ تینی کمکاری ءِ پین سوگو کیرہ ہرا ڈیہہ اٹی مدامگی امن، شونہالی و سوگوی نا اسیجائی وژن نا اہم بشخ ءِ۔ واشنگٹن (اے پی پی/ ویب ڈیسک)