وزیر اعلیٰ بگٹی تون کشمیر آل پارٹیز حریت کانفرنس نا راہشون نا اوڑدہی

وزیراعلیٰ بلوچستان میر سرفراز بگٹی تون کشمیر آل پارٹیز حریت کانفرنس نا راہشون حسن بنا اوڑدہی کرے۔ اوڑدہی نا وخت آ مقبوضہ جموں و کشمیر نا پوسکن آ حالیت، کشمیری الس نا حقِ خودارادیت نا جہد و ڈیہہ انا جم حالیت آ جم گپ وتران کننگا۔ دا وخت آ حسن بنا کشمیری الس تون یکجہتی نا درشانی و کشمیر ناویل ءِ ہر کہول آ چست کننگ نا بابت حکومت بلوچستان و وزیراعلیٰ میر سرفراز بگٹی نا موقف و گام گیج آتا ستاءِ کرے۔ وزیراعلیٰ بلوچستان میر سرفراز بگٹی پارے کہ کشمیر ناویل اقوامِ متحدہ نا سلامتی کونسل نا قرارداد آتا رِد اٹ ایسری خواہوک اسہ جہانی جھیڑہ اسے‘ ہرانا انصاف آ تالان مدامگی ایسری کشمیری الس ءِ اوفتا بنداوی حق، حقِ خودارادیت فراوان کننگ آن بیدس مننگ کپک۔ او پارے کہ پاکستان و بلوچستان نا الس تینا کشمیری ایلم تتون مدام ہم کوپہ سلوک ءُ و آخبت اٹی ہم اوفتا ہر وڑ انا سیاسی، سفارتی و اخلاقی مخ تفی ءِ برجا تخرہ۔ وزیراعلیٰ پارے کہ کشمیری الس قربانی ترسا آجوئی نا جہد ءِ زندہ تخانے و اوفتا دا قربانیک زیان مفسہ۔ او جہانی برادری آ زور شاغا کہ او مقبوضہ جموں و کشمیر اٹی انسانی حق آتا خلاف ورزی تا نوٹس ہلے و کشمیری الس ءِ اقوامِ متحدہ نا قرارداد آتا رِد اٹ تینا آخبت نا فیصلہ کننگ نا حق رسیفنگ کن کڑد ادا کے۔