پاکستان و ایران نا تین پہ تینی واپار کچ ءِ 10 ارب ڈالر اسکان ودفنگ آ امنا
Get real time updates directly on you device, subscribe now.
پاکستان و ایران نا نیام اٹی ہڑتوم آ کنڈ آتا واپاری کچ ءِ 10 ارب ڈالر اسکان ودفنگ آ امنا مسنے۔ پاک ایران اسیجائی واپاری کمیٹی نا دہمی دیوان اسلام آباد اٹی مس ہراڑے واپار وزیر جام کمال خان و ایرانی وزیر صنعت و تجارت دیوان نا اسیجائی کماشی ءِ کریر۔ واپار وزارت نا رِد اٹ 3 دے ئی مذاکرات اٹی واپار، زرکاری و اقتصادی کمک نا اہم آ بشخ آتیا امنا کنگا وامنائی اٹ فیصلہ غاتیا دمدستی عملدرآمد کن تکنیکی کمیٹیک کاریم ءِ برجا تخرہ۔ واپار وزارت نا کمامدار آتا رد اٹ کہ دیوان نا وخت آ پاکستان و ایران نا ہڑتوم آ کنڈ آتا واپاری کچ ءِ 10 ارب ڈالر اسکان ودفنگ آ امنا کننگا۔ واپار وزارت نا رِد اٹ پاکستان و ایران نا نیام اٹی واپاری معاہدہ نا قاعدہ و ٹیرف اٹی کمتی نا وڑ و ڈول آ اہم پیشرفت مسنے وخت اس کہ پاکستان و ایران بزنس ٹو بزنس رابطہ غاتے پین سوگو کننگ، بارٹر ٹریڈ نا نظام ءِ ودفنگ و بھرمی جوڑ کننگ آ امنا کرینو۔ واپار وزارتِ نا رِد اٹ ہڑتوم آ ملک آک پشین کوہک سیمی مارکیٹ نا بنانا عمل ءِ تیز کننگ آ امنا و اسیجائی سیمی منڈی تا بھرمی بست و بند کن اسیجائی کمیٹی جوڑ کننگ نا فیصلہ کریر۔