اسلام آباد ہائیکورٹ نواز شریف نا تران تیا رکھ انا درخواست ءِ خارج کرے
لاہور (آن لائن) پاکستان ڈیمو کریٹک الائنس نا کنڈآن ساڑی حکمران آتے اقتدار آن کشنگ کن بنا کروک آ تحریک ءِ توننگ کن پاکستان مسلم لیگ (ن) نا کماش و مسکوہی وزیراعظم میاں نواز شریف تون اوار 35 (ن) لیگی راہشون تا برخلاف بغاوت نا مقدمہ ءِ درج کننگانے، دا مقدمہ تھانہ شاہدرہ ٹی درج کننگانے، حوال نا رداٹ میاں نواز شریف نا برخلاف دوبہ دار نا وڑاٹ سازش، بغاوت و اُلس ءِ ورغلائفنگ نا دفعہ غاتا رداٹ مقدمہ ءِ درج کننگانے وخت اس کہ ایف آئی آر اٹ مریم نواز تون اوار ایلو لیگی کماش آتے ہم پندار کننگانے۔ ایلو کنڈ آ اسلام آباد ہائی کورٹ مسکوہی وزیراعظم نواز شریف نا تران تیا پابندی نا درخواست ءِ خارج کرے۔ اسلام آباد ہائیکورٹ درخواست ناقابل سماعت گوندسا خارج کرے۔ چیف جسٹس اطہر من اللہ 5 پنہ نا تحریری فیصلہ اس ہم جاری کرے۔ فیصلہ ٹی پاننگانے کہ سیاسی مواد نا بابت معاملہ غاتے عدالت آتیٹی اتنگ اُلسی مفاد اٹ اف، دا وڑ نا درخواست آتیکن متبادل ءُ فورم اس ساڑی ءِ۔ فیصلہ ٹی داہم پاننگانے کہ درخواست تروک مطمئن کننگ کتو ننے کہ نواز شریف نا تران آن اونا ہرا ہرا حق آک زہمی مننگ اٹی ءُ۔