فیڈل کاسترو         6             Fidel Castro 

یونیورسٹی ……………… سیاست نا لُمّہ:۔

مڑوئی فیڈل حالیت آتیا بھاز سجفے، اودے او وخت آ ساڑی کل سیاسی ٹولی تیٹی اسٹ اس ہم دن لگتو۔ ہراکہ گچین کاری کرفنگ نا بابت سنجیدہ مرے، یا او آمریت نا برخلاف گڑاس کننگ نا ارادہ تخے۔ اسہ اِرا بندغ اس دارالحکومت ہوانا نا چھاؤنی آ جلہو کننگ نا ہیت ءِ کریر۔ ولے او جلہو تو ہِچ متو بس فوج ءِ سما تما۔ فوج ہشار ہم مس۔ و بھاز آ بندغ آتے دزگیر کننگ ہم بنا کرے۔ ہنداڑان فیڈل دارالحکومت ہوانا نا چھاؤنی آ جلہو نا ہیت آن اسل نمن مس، اونا نظر ایلو بھلا چھاؤنی سنتیا گوڈی کیوبا غا ئس۔ 

کاسترو حالیت آتا جوانی اٹ جاچ ءِ ہلک۔ او وخت آ کیوبا ٹی تپہ ئی شعور نا پن ہم الو۔ امریکہ نا کیمونسٹ دشمن ’میکارتھی ازم‘ نا نظریہ اونا سُپرپاوری نا سرکاری نظریہ جوڑ مسوسُس۔ دنیا نا ہر کماش کمیونزم آن خلیس اٹی اختہ ئس۔ ہر جاگہ غا کمیونزم کن سیاست کروک آ پارٹی تیا قیامت بیٹ کننگاسُس۔ فیڈل پین وڑو ڈول اس پٹّا، او غیر منظم انگا کیمونسٹ پارٹی (ہرا کہ 1925ء اٹی اڈ تننگاسُس) آ سیبو کننگ نا جاگہ غا پوسکن ءُ فورس اس جِک کننگ نا فیصلہ کرے۔ او مُسہ چار کماش تون اوار مرسا ”آرتھوڈوکس یوتھ“ پنی تنظیم اٹی 1200 ورنا گچین کرسا اوفتے اسیجا کرے و اوفتے جوان ہیل تس و بھاز سجفنگ آن پد ہر علاقہ غان منہ ورنا گچین کرے۔ اونا پس منظر نا بدلی تے کن و اونا است خواہی نا کڑمبی و لَس مخلوق تون اونا کمٹمنٹ وڑ انگا ہیت آتے خاص منسا بندغ آتے بھرتی کرے۔ لَس وڑ اٹ او انصاف پسند، دزی و کرپشن نا برخلاف و بے روزگاری نا برخلاف بندغ…… کل ءِ مُچ کرے و اوفتے جوان وڑ اٹ لیکچر تس و راجی گندہی تا اصل سوب نظام ءِ گوندا۔ آرتھوڈوکس نا دا ورناتے زرکاری نظام نا گندہی تا بارو اٹ جوان سرپند کرے۔ 

او بندغ آک بتستا (آمریت) زوراکی تا برخلاف تو ئسرہ۔ داسہ او سامراج دشمن ہم جوڑ مسوسُر۔ کاسترو جوان انگا ورنا تیا اڈ تروک ءُ اسہ سیل اس جوڑ کرے پدا اوفتے کمیونزم نا بارو اٹ خوانفنگ نا بِنا ءِ کرے۔ دا سیل آتیٹی ایلو کتاب آتیان بیدس خاص وڑ اٹ فرانز فیرنگ نا نوشتہ کروک آ ”کارل مارکس نا داستان سیاست“ ہم ئس۔ سیل انا کل انچارج آک ہم مارکسسٹ ئسرہ۔ داڑے کل آن بودی آ گڑا ڈسپلن ئس۔ سوگو وڑ انا ڈسپلن‘ اسہ زیرخون انقلابی ڈسپلن اس۔ 

اوفتا کل انا مسخت اسٹ ئس کہ بیرہ 10مارچ 1952ء آن مُست انا حالیت آتے پدی اڈ تننگے۔ سلہہ بند واکداری اٹ بتستا حکومت ءِ ایسر کننگے و آئینی حکومت اس بنا کننگے۔

بیست و شش جولائی:۔

بتستا نا زوراکی اٹ جوڑ مروک آ حکومت ءِ منہ ہفتہ مسوسُس کہ اسہ بیست و پنچ سال انا وکیل اس ہوانا نا عدالت اٹی پیش مس، و دا درخواست ءِ تس کہ بتستا و اونا کمکار آک ملکی کانود نا شش دفعہ غاتا رداٹ ڈوہدار و سزاوار ءُ۔ ہندا سوب آن اوفتیان ارّفنگے۔ و اگہ دوبہ غاک سہی ئسر تو اوفتے کانود نا وڑ اٹ یک سد و ہشت سال بندی گری نا سزا تننگے۔ 

او ورنا غا وکیل نا پن فیڈل کاسترو ئس۔ دا سفا پاش ئس کہ اونا درخواست ءِ رد کننگک، ولے گنوک آ بندغ تینا جان آن ہیج ہرفسا تینا توار ءِ پین وڑ اٹ سر کننگ اٹی لگّا۔

قومی و سیاسی تحریک اٹی ہوانا نا خوانندہ غاک یکا مون مُستی مسنو۔ 1870ء اٹی کیوبا نا اولیکو آجوئی نا تحریک اٹی ہفت میڈیکل طالب علم آتے ہسپانوی بادشاہک بازار اٹی سم تا گواچی کرسا کسفیر و 1934ء آن گڈ ہوانا یونیورسٹی نا پوڑیک واردم آ طالبعلم آتا دِتر آن خیسن مرسا کریر۔ ہندا طالبعلم آتیٹی کاسترو رضاکار بھرتی کرے۔

ہفتئی تلار 

تاک: 37

26 Sep-02 Oct, 2020

پنہ: 03