کراچی نا ویل آتا ایسری کن بنجا2 سال آن پد سنجیدہ خننگ انگ اٹی ءِ‘بلاول

 کراچی(آن لائن)پاکستان پیپلز پارٹی نا چیئرمین بلاول بھٹو زرداری پارینے کہ کراچی نا ویل انا ایسری کن ارا سال آن پد بنجائی حکومت سنجیدہ خننگ انگ اٹی ءِ، اومیت ءِ کہ وزیراعظم ننا گمان تیا جوان وڑاٹ مون آ بریک، سخت انگا وخت اٹ شہبازشریف نا بننگ آ اونا منتواری ءِ ہرفنہ، ہراتم اسہ جج اسے نا زائیفہ غان سوج مریک تو خصوصی کمکار ہم ہندا معیار آ برے، اگہ صحافی احمد نورانی نا خبر آ استیفہ تسنے تو دانا مطلب ءِ کہ وڑ اس ارے، حکومت کراچی والا تے کن بجلی نا نہاد ءِ ودفنگ نا فیصلہ ءِ پدی الے انتئے کہ مچ آ سندھ اٹ پِر و نوکاپ آن بھاز نسخان مسنے، او دا پاش کرے کہ ایڈمنسٹریٹرکراچی نا پڑو  سندھ حکومت کیک۔ تدوک آ دے کراچی ٹی وزیراعلیٰ ہاؤس اٹ چیئرمین پیپلزپارٹی بلاول بھٹو زرداری پریس کانفرنس کرسا پارے کہ پِر اٹ اُلس ءِ کیہی ویل آک مون ترو ک ئسر، 100سال آن پد داخس پِر مسنے ولے زہمی تا بحالی کن جوان کاریم کننگ اٹی ءِ، بلاول بھٹو اومیت آتا درشانی ءِ کرے کہ دورہ کراچی ٹی وزیراعظم عمران خان مچ آ سندھ اکن پیکج نا پڑو ءِ کے و وزیراعظم مچ آ صوبہ نا گرج آتے پورو کیک۔ او پارینے کہ کراچی ٹی بیرہ 3 نالی نا سفائی آن کاریم پورو مفک۔