گرینڈ سلیم نا اعزاز ءِ ولدا دوئی کننگ کنکن سخت مریک‘اینڈی مرے

لندن(مانیٹرنگ ڈیسک) برطانوی ٹینس سٹار اینڈی مرے پارینے کہ اوڑکن گرینڈ سلیم نا ٹائٹل ءِ تینا پن آ کننگ سخت مریک۔ ولے او دادے کٹنگ نا جوان کوشست کیک۔ میڈیا تون ہیت وگپ کرسا او پارینے کہ گرینڈ سلیم نا دوئی کننگ سخت مریک ولے ای اودے دوئی کننگ نا کوشست کیوہ، ای ٹائٹل ءِ کٹنگ نا جوان محنت کیوہ۔ یات سلے کہ اینڈی مرے 2012ء اٹ اولیکو گرینڈ سلیم ءِ تینا پن آ کریسُس۔ اوکان پد او 2013ء و 2016ء ٹی ومبلڈن اٹ سرسہبی دوئی کریسُس۔ اونا سرسہبی کن او وخت آ بریک بس ہراتم 2018ء ٹی اودے ٹھپی مننگ آن پد آپریشن کروئی تما۔ یات سلے کہ منہ دے مست تینا بیان اٹ برطانیہ نا 33 سال نا ٹینس اسٹار اینڈی مرے پاریسُس کہ شیدائی تیان بیدس گوازی کننگ کنتون اوار کل گوازی گرتیکن اسہ سخت ءُُ آزموندہ اس مننگ کیک۔ اینڈی مرے پاریسُس کہ خالی آ پِر اٹ بیدس شیدائی آن گوازی کننگ کل گوازی گرتیکن ذہنی وڑاٹ سختی اس مریک۔ ولے او پارینے کہ ٹینس نا گوازی نا لیول زیات معنی تخک۔ ولے شیدائی تیان بیدس خالی آ پڑ اٹ گوازی کننگ نا عجیب ءُُ آزموندہ کن ذہنی وڑاٹ تینے تیار کننگ اٹی اُٹ۔