اقتدار اٹ مفننگ آن پد ہم مخلوق نیشنل پارٹی ٹی بننگ اٹی ءِ،میر رحمت صالح بلوچ

نیشنل پارٹی نا بنجائی راہشون و بلوچستان اسمبلی ٹی ڈپٹی پارلیمانی لیڈر میر رحمت صالح بلوچ پارینے کہ چار شنبے نا دے چار بجہ غا کوئٹہ پریس کلب اٹی نیشنل پارٹی نا اسہ بھلو اواری پروگرام اسے نا بست و بند کننگانے ہراٹی بلوچستان نا جتا جتا ضلع غاتیان، خاص وڑ اٹ پنجگور تون تعلقدارجتا جتا سیاسی جماعت آتا راہشون و کارندہ غاک نیشنل پارٹی ٹی اوار مننگ نا باقاعدہ پڑو ءِ کیرہ۔ دود آن نیشنل پارٹی نا بنجائی سرکڑدہ‘ قومی و صوبائی اسمبلی نا باسک و ایلو سینئر راہشونک تران کیرہ۔ میر رحمت صالح بلوچ پارے کہ ساڑی سیاسی نااومیتی و بے باوری نا حالیت اٹی جتا جتا سیاسی جماعت آتیان تعلقدار کارندہ و راہشون آتا بھلا کچ اٹی نیشنل پارٹی ٹی اوار مننگ پارٹی نا پرامن، جمہوری و اصولی سیاست آ السی پت انا پیدوار درشانی ءِ‘ او پارے کہ دا نیشنل پارٹی کن شرف انا ا ہیت اسے کہ اقتدار اٹی مفننگ آن پد ہم مخلوق اونا صف آتیٹی اوار مننگ اٹی ءِ‘ ہرا دا ہیت انا شاہدی ءِ کہ الس بلوچستان نا حق، وسیلہ، کرک‘ و سیاسی وتواجہی نا بابت نیشنل پارٹی نا پیدوار وپبی موقف نا ستاءِ کیک۔ او پارے کہ نیشنل پارٹی نا پکا یقین ءِ کہ بلوچستان ءِ مون تروک سیاسی، زرگزرانی و راجی ویل آتا مدامگی و آخبتی ایسری بیرہ پرامن سیاسی جہد، جمہوری مزاحمت، آئینی کسر و السی واک انا کمک اٹ مننگ کیک۔ پارٹی مدام بیدادی نا جاگہ غا مذاکرات، جمہوری ریسہ و سیاسی جہد آ باور کیک۔ اوپارے کہ ہرا سیاسی شخصیت و کارندہ غاک نیشنل پارٹی ٹی اوار مننگ نا فیصلہ کرینو اونا جوان زہم نئے بیرہ پارٹی نا تنظیمی سوگوی آ تمک بلکن بلوچستان نا جم سیاسی حالیت آ ہم تمک۔ او نیشنل پارٹی نا کل کارندہ، عہدیدار و ہمدرد آتیان خواست کرے کہ او گرینڈ اواری پروگرام اٹی پبی بشخ ہلیر و پوسکن اوار مروک سنگت آتے جم وجوش اٹ بخیر کیر و تینا ساڑی گری اٹ دا مچی ءِ سرسہب کرسا پارٹی نا سیاسی کلہو ءِ پین سوگو کیر۔،پنجگور (نامہ نگار)