لشکری رئیسانی نا کچھی ءِ سبی ٹی اوار کننگ نا برخلاف آئینی درخواست

نوابزادہ لشکری رئیسانی ضلع کچھی ءِ سبی ڈویژن اٹی اوار کننگ نا برخلاف بلوچستان ہائی کورٹ اٹی درخواست دائر کرینے۔ نوابزادہ لشکری رئیسانی کوئٹہ ٹی میڈیا تون ہیت و گپ اٹی پارے کہ بلوچستان نا ویل آتیٹی ہڑدے ودکی مننگ اٹی ءِ‘ جتا جتا ویل آتے ہرفنگانے ہرافتے ٹی ضلع و ڈویژن تے ٹی بدلیک اوار ءُ۔ او پارے کہ قلات ڈویژن نا پن ءِ چٹفنگا ہرانا تاریخی حیثیت اسے، نصیر آباد ڈویژن نا اہم انگا بشخ کچھی ءِ حکومت سبی تون اوار کرے۔ لشکری رئیسانی پارے کہ بلوچستان اٹی بے ایمنی و ویل آتا بنداوی سوب غلط انگا پالیسیک ءُ۔ او مستی پارے کہ بلوچستان اٹی امن تون اوار کل باندات آتیکن کڑد ادا کرسا کینہ۔