صوبہ نا ساڑی بے چیٹ حالیت و بے ایمنی تیٹی الس ءِ تنیا الیپنہ،اصغر خان اچکزئی

عوامی نیشنل پارٹی نا صوبائی صدر اصغر خان اچکزئی پارینے کہ صوبہ نا بے چیٹ حالیت، شاہراہ تا بند مننگ و ودوک آ بے ایمنی نا حالیت اٹی الس ءِ تنیا الیپنہ۔ 8 اگست نا شہید آتا یات اٹی چمن اٹی جلسہ وخت اس کہ 17 اگست آ کوئٹہ ٹی زیارت و اگست نا تُو اٹی مروک واقعہ غاتا شہید آتیکن ہڑزخواہی ریفرنس اڈ تننگک‘ ہراٹی دھرنا ٹی اوار کل سیاسی جماعت و سانحہ زیارت نا شہید آتا پدخاہوت آتے ہم سلہ خلنگک۔ دا خیال آتا درشانی او دوشنبے نا دے تینا ایلو بنجائی و صوبائی عہدیدار آک (ر) سینیٹر داؤد خان اچکزئی، صوبائی جنرل سیکرٹری مابت کاکا، ثناء اللہ کاکڑ، عبیداللہ عابد، باری کاکڑ، جاوید کاکڑ تون اوار تدوک آ دے صوبائی مجلس عاملہ نا دیوان اٹی کروک فیصلہ غاتا بابت میڈیا ءِ بریفنگ ترسا کرے۔ دا وخت آ عثمان خان اچکزئی، حاجی نظام الدین کاکڑ، نذر پیر علی زئی تون اوار ایلوفک ہم ساڑی ئسر۔ اصغر خان اچکزئی پارے کہ دیوان اٹی ملک، بلوچستان و خیبر پختونخوا نا جم سیاسی حالیت نا جم جاچ ہلنگا۔ بلوچستان و پشتون علاقہ غاتیٹی ودوک آ بے ایمنی گڑتی نا سوب ءِ‘ اول سیاسی کارندہ غاتا لاش ہرفینہ، داسہ جج و رکھوک آک ہم رکھوک افس۔ سانحہ زیارت و جج عبدالحکیم کاکڑ نا شہادت بھلو سوج چست کرینے، جج عبدالحکیم کاکڑ نا شہادت آ چیف جسٹس بلوچستان نا کنڈ آن سوموٹو نوٹس مفننگ سوجی ٹِک اسے۔ بلوچستان اٹی حالیت آک ڈٹ انا رِد اٹ خراب کننگ انگ ءُ، زیارت نا شہید آتا پدخاہوت آتا دھرنا آخبت نا رکھ اکن ئسکہ۔ وخت اس کہ اسہ وار ولدا کیبی علاقہ ہنہ اوڑک اٹی لاش تے تننگ کن دھرنا تننگانے، حکومت سنجیدگی نشان ایتے۔ سوات دتری ءِ وخت اس کہ کوئٹہ تون اوار بلوچستان اٹی دھرناک برجا ءُ۔ بلوچستان نا کیہی ضلع غاتیٹی عملاً کرفیو نا حالیت ءِ و مخلوق خلیس نا سوب آن کراچی نا سفر ہم کپننگ اٹی ءِ‘ حکمران آتے خار ہلوک بلوچستان و خیبر پختونخوا ٹی کُشت و خون انتئے نظر بفک؟ اگہ پاکستان اسٹ ءِ تو گڑا تو شاری تا دتر نا رکھ انتئے مفننگ اٹی ءِ؟ بارڈر بند مننگ آن ہزار آ خاہوت آتا روزگار پلنگانے۔ زیارت دھرنا مذاکرات اٹی حکومت 80 درسَد خواست آتے امنا کریسس، اوکان پد اتنگوک پوسکن آ ڈرافٹ بدنیتی آ تالان ئسکہ، ہرانا مذمت کننگا۔ بلوچ و پشتون الس ءِ جنگ تننگ نا ہر سازش ءِ بے سہب کینہ‘ داخس بھلا واقعہ غاتیان پد ہم ہچ ءُ حوالدار و زموار بندغ اس استیفہ تتو۔