زندان نا ڈائری 3 (اولیکو دزگیری)

ننے سیاسی ہند انا تہہ انا درگہ غان کشسا زندان نا اِرا دیوال تا نیام انا سڑک واج آ کسر آ دریر۔ ہراڑان زرس مُر اسہ گڑد واج ءُ علاقہ اس ئس۔ ہرانا نیام اٹ اِرا مسہ کوٹھی آ تالان اسہ ماڑی اس تفوک ئس۔ اوڑے اسہ حوالدار اس کڑسی آ زمبرینگوک ئس۔ ہرانا داپار ایپار آن زندان نا منہ سپاہی و منہ مون پوشکن ٹوپی ءُ بندی سلوک ئسر۔ ننے زندان نا سپاہی دا چکر جمعدار آ درے۔ دا چکرجمعدار نا پن بہادر ئس۔ ہراڑتون پاٹ انا جوڑ کروک ٹکٹکی اس جک ئس۔ ہرادے خلیس و بھیم انا چیدہ نا وڑ تخنگاسس۔ ہراڑان بیدادی و زوراکی نا درشان مسکہ۔ چکر اٹی بندی و سپاہی تا سرجز برجا ئس۔ ہنداخہ سے ٹی علی احمد کرد، و کنا بھلا ایلم اسلم کرد ہرا مہالو آن داڑے بندی ئسر، بسر۔ کنے و ولی محمد لہڑی ءِ تین تون دریر۔ ننا ایلو سنگت آتے زندان اٹی ساڑی ایلو سیاسی بندی تتون رہیفنگ کن دریر۔

علی احمد کرد و کنا بھلا ایلم اسلم کرد جیل انا ہسپتال وارڈ اٹی بند ئسر۔ اوڑے اوفتتون امان اللہ شادیزئی، عطاءاللہ بزنجو، و امان اللہ بازئی اسک ہم بندی ئسر۔ دا دے تیٹی دافتیان بیدس بلوچ اسٹوڈنٹس آرگنائزیشن بلوچستان نا قائم مقام صدر عبدالقیوم ساسولی، خورشید احمد جمالدینی، یعقوب پیل، قاسم بلوچ (صوفی عبدالخالق نا خوارزادہ) نیشنل عوامی پارٹی نا راہشون تیٹی سینیٹر میر محمد عزیز کرد، سینیٹر زمرد حسین، آغا وہاب شاہ دلسوز، نیپ بلوچستان نا سالار آغا مجید شاہ، ملک عبدالرسول لہڑی، عبدالرحمن لانگو، اکبر اچکزئی، مارکر فیکٹری آن تعلقدار مزور تیان سرفراز احمد بنگلزئی، دوست محمد بنگلزئی، عبدالرحمن رند، عبدالسلام، غلام حیدر، محمد اعظم، گل محمد کاسی و منہ پین مزور بندی ئسر۔ داکان بیدس پنی آ سلہہ واپار غلام محمد ڈوسل، لونگ خان مینگل و علی محمد مینگل اس تتون پیش بروک واقعہ غاتا دے تیٹی دزگیر مروک آتا اسہ بھلو کچ اس کوئٹہ ڈسٹرکٹ جیل اٹی زندان نا دے تے گدریفیرہ۔

سینیٹر میر محمود عزیز، سینیٹر زمرد حسین، نوابزادہ شیر علی خان و غلام محمد ڈوسل اے کلاس نا بندی ئسر، ہرا اے کلاس نا بیرک اٹ رہینگارہ۔ دا چنکا بنگلہ واج آ بیرک ءِ وائٹ ہاﺅس پاننگاکہ، ہرا جیل انا چکر اٹی پترینگ تون راستیکو دُو آ ارٹمیکو دنگ ئسکہ۔ وائٹ ہاﺅس جیل انا ایلو بیرک آتیان جتا ئس، ہرا مچ آن مچ پیہن ئس۔ اسہ بیڈ روم، اسہ ڈرائنگ روم اسے تون اوار اٹیچ باتھ روم اسے آ تالان ئس۔ کوٹھی تا درگہ غاک آہن نا اَلوس، پاٹ انا ئسر۔ سیخ انا جاگہ غا جالی خلوک ئسر۔

وائٹ ہاﺅس واج آ دا بنگلہ 1961ءنا بنا ٹی ہمو وخت تفنگاسس، ہراتم بنگال آن تعلقدار وزیر اعظم پاکستان حسین شہید سہروردی ءِ پاک آرمی نا کمانڈڑ انچیف جنرل ایوب خان نا مارشل لاءایڈمنسٹریٹر نا حیثیت اٹ تعیناتی و مولانا عبدالحمید بھاشانی نا دزگیری آن نمن مننگ آ 18 اکتوبر 1957ءاٹ استیفہ تننگ آ بیوس کننگاسس۔ ولدا فیلڈ مارشل محمد ایوب خان 31 جنوری 1961ءنا دے غداری نا دوبہ ٹی اودے دزگیر کرے۔ مسکوہی وزیر اعظم پاکستان حسین شہید سہروردی ہندا وائٹ ہاﺅس اٹی بندی گری نا دے تے گدریفیسس۔

دا دے تیٹی ڈسٹرکٹ جیل کوئٹہ نا وائٹ ہاﺅس واج بنگلہ نیشنل عوامی پارٹی نا بندی راہشون تا ہنکین ئس۔ ہراٹی میر گل خان نصیر، سینیٹر محمد عزیز کرد، سینیٹر زمرد حسین، صوبائی اسمبلی نا باسک شیر علی خان و اسہ پوریاگر غلام محمد ڈوسل رہینگارہ۔

ننا جیل اٹی بننگ آن مست بلوچ اسٹوڈنٹس آرگنائزیشن نا باسک و ایلو طالب علم راہشونک جیل انا چندی بشخ آتیٹی رہینگارہ۔ منہ دے ای تینا بھلا ایلم تون رہینگاٹ۔ سنگت آتا بھلو کچ اسے نا بندی مننگ نا سوب آن جتا جتا جاگہ غاتیا بندی سیاسی راہشون تے جیل انا اسہ بشخ اسے ٹی، 9 و 10 نمبر نا تنہائی تیٹی شفٹ کننگا۔ دا بشخ کچہ بندی تا بشخ انا پن اٹ پنی مس۔ دا بشخ اٹی اِرا ’کال کوٹھڑی‘ نا لین و اسہ بارک اس ئسکہ۔

علی احمد کرد، امان اللہ بازئی، و امان اللہ شادیزئی اسہ تنہائی سے ٹی شفٹ مسر۔ ایلو تنہائی ٹی اسلم کرد، عبدالقیوم ساسولی و خورشید بلوچ (جمالدینی)، ہندا وڑ شین اٹ وہاب شاہ دلسوز، عطاءاللہ بلوچ (بزنجو)، یعقوب پیل، ملک عبدالرسول لہڑی، عبدالرحمن لانگو، اکبر اچکزئی، کریم اچکزئی، یونس کاسی، سرفراز بنگلزئی، دوست محمد بنگلزئی، دن پا غٹ سیاسی بندی و مارکر فیکٹری نا مزورکار آتے مسٹ مسٹ آ جتا جتا تنہائی تیٹی بند کننگا۔

ہفتئی تلار

تاک: 29

25-31 July 2020

پنہ: 02