عقل انا ہیت اس

 پیر انگاک پاریرہ کہ تینا سفر نا بارو اٹ ہرکس ءِ پاننگ جوان اف۔ انتئے کہ بندغ دوست دشمن تخک۔ حسد کروک ءُ، بد دروک ءُ بندغ بھاز ءِ۔ کس انا پیشانی آ نوشتہ اف کہ او است اٹی اخہ در سفا و اخہ در مون ءِ۔ ہندن وخت آن مست تینا سرسہبی نا یا غزہ سے نا بارو اٹ ہم معلومداری تننگ جوان اف۔ مننگ کیک ہمو بندغ نا حریف پیش تمے، نے بٹنگ کن وخت انا چاری مرے۔ داڑان مست تو سوج ودی مسکہ کہ دا امر مننگ کیک، کہ چنکو ہیت اس اسہ دم ہُل مرے۔ مر و خڑک انا تے وس اس دو برے کہ او نسخان نا سوب جوڑ مریر۔ ولے عقل، سائنس و زمانہ دا ہیت ءِ اینو پک کرینو۔ اسُل ہندن دن کہ ننا نبی پاک چندی گڑا تیان تینا وخت انا بندغ آتے معلومدار کریسس، یا اسلام نا گچین آ عمل آک اینو سائنس انا دوی اٹ پاش مننگ اٹی ءُ۔ کورونا ءِ ہلبو، پاننگا کہ وضو و دو سلنگ اٹی شفا ارے۔ وائرس آتیان بندغ بچک او ہم پاش مس۔ کنوک آ گڑا تا بوز ءِ ڈکنگے، تیڷ، چچی و ایلو جوجک اس اوفتیٹی تمنگ کیک۔ کنوک آ گڑا زار اٹی بدل مریک۔ ہندن وخت آن مست جوان انگا عمل ءِ پاش کننگپ، تو جوان ءِ۔ اینو سوشل میڈیا و ہر جاگہ کیمرہ غاتا مننگ دا ہیت ءِ پاش کرے کہ پڑدہ داری ایمان نا بشخ اسے۔ بندغ اسہ ساہت اسے ٹی ہُل و رسوا مریک، بے پڑدہ مریک۔ بندغ نا بے شرف مننگ اٹی ہچ ءُ وخت اس لگپک۔

داڑسکان کہ نادانی و بے سمائی ٹی بندغ نا توڷ و بش و چنکو ہیت اس اونا زند انا خواری و جوانی تے پوک کیک۔ درو نا بندغ آتیٹی شیطان و نزور ءُ بندغ مچٹ اس ئسر۔ بندغ آتتون ضمیر پن انا گڑاس ئس۔ بندغ پن و قوم اٹ پاش ئسکہ۔ اینو تو بندغ پاش اف۔ ہرکس انت پن اس ہرفے تینے ہرا قوم انا بندغ اس جوڑ کے ہر غزہ اس تین تون گنڈے، ہرا پن و چاہنداری اٹ تین کن آئی ڈی اس جوڑ کے، بس دن پا ”نامعلوم“ آتا زمانہ ءِ۔ نامعلوم نا انت ضمیر اس مرو ءِ، اودے انت خلیس اس مرو ءِ، اوڑکن کس ءِ رسوا کننگ، کس انا خواری تے مش تا گواچی کننگ، بدنام کننگ، اینو ساہت تیری اس جوڑ مسنے۔ ہندا سوب آن اینو نا بندغ بندغ آن خلنگ اٹی ءِ۔ اینو نا خرماک انسان نا دروشم اٹ بندغ نا دامون ایمون چرینگ انگ اٹی ءُ۔ داسہ داڑکن پیر انگا تا ہیت آتے مزغ اٹی تولفوئی مریک۔ بدل مروک آ وخت ءِ پہہ مروئی تمک۔ پوسکن آ ٹیکنالوجی نا ویل و ڈکھ آتیان تینے بچفنگ کن زیات آن زیات تینے معلومدار تخوئی تمک۔ اُرا، خاہوت، آتیٹی تموک آتاڑ واڑ نا سوب آتے معلوم کروئی تمک۔ کچک خف ءِ نا درے، بننگ تون کچک نا رند اٹ ہننگ آن مست تینا خف ءِ ہروئی تمک۔ درو نا جوڑ کروک آ متل آتے پہہ مروئی تمک۔ و تینا اولیاد آتے زیات آن زیات پہہ کروئی تمک۔ ہر ہیت ءِ کننگ آن مست جوان خلاسوئی تمک۔ ہننگ بننگ و تولوک آ جاگہ غاتیٹی ڈکوک آ کیمرہ غاتا ساڑی مننگ آن خبڑدار مروئی تمک۔ اینو نا بندغ ءِ سما مرے نا معلوم آ بندغ سیخا غانبار اوڑتون تد ءِ۔ سیخا تون جنگ مفک۔ سیخا ءِ کس دتر کننگ کپک، سیخا ءِ تینا سیخا پاش کننگ کن علم و ٹیکنالوجی آن تینے واخب کروئی تمک۔ اینو دروغ ہندن تڑنگک کہ او راست خننگک۔ دروغ تڑ نا دروغ ءِ ہلنگ کن راستکی نا علم المی ءِ۔ بھلا نسخان نا کچ ءِ کم کننگ یا تینے بچفنگ کن تینا ہم خیال و مہر کروک آتا کچ ءِ وفوئی تمک۔ دا میدان اٹی پُٹی ءِ تروک آک پُٹی آ مروک آ وار آن جک مننگ کپرور۔ اسہ لوز اسے حکمت عملی، دادے ننے پہہ مننگ نا گرج ءِ۔ داڑا عمل کننگ نا اینو کل آن بھلا گرج ءِ۔ دنیا ٹی اینو ہر ہمو ملک انا بندغ آک خوار ءُ یا سخت ءُ وخت اسے آن گدرینگ انگ اٹی ءُ، ہرافتتون حکمت عملی پن انا گڑاس اف۔ عقل انا ہیت ہندادے کہ اینو عقل آن زیات کاریم ہلنگے۔

ہفتئی تلار

تاک: 29

25-31 July 2020

پنہ: 01