پدین آ سیخا

سیخا تو بھاز ءِ، ولے ارا سیخا ءُ کہ اوفتا کچ کل جہان نا سیخاک بننگ کپسہ، خدا کپ اگہ بندغ آن او سیخاک جتا مسر تو بندغ ءِ خلکن انگا بسترہ غاک یخ انگا کوٹھیک ہم وڑپسہ۔ تو او سیخاک اسٹ لمہ جیجا ارٹمی باوہ جان ءِ، دنیا ٹی بندغ نا ہستی ہندا ہڑتوم آک ءُ۔ لمہ جان و باوہ جان داخس کہ تین کن سوچپسہ تینا چنا تے کن سوچرہ، تینٹ امر زند تا روان ءِ، ولے پارہ بھاز جوان ءِ، ولے تینا چنا تا سوچرہ کہ مستی کار دنیا ٹی ہر حساب اٹ سرسہب مریر، ہرافتا لمہ جان و باوہ جان اریر، تو ای خنانٹ ہندن ءُ جاگہ کہ تینا سیخا تا قدر ءِ بھاز کم کیرہ، تو ننے ہموتم دافتا قدر قیمت نا سما تمک، خدا کپ اگہ دا دنیا ٹی تنیا ننے الار۔

اسہ وار کسر اسے ٹی راہی روان ئسٹ تو خف تیٹ نا گمان زار زار ہوغنگ نا توار تما، ای ہمینگ راہی مسٹ تو خناٹ بھلو مچی اس سلوک ءِ، اوڑے سر مسٹ تو سما تما اسٹ اسے نا سیخا یعنی باوہ جان تے موکل کرینے، اونا چناک بد حال ئسر، گڑاس تو ہوش ءِ تینا گوہاسر، و گڑاس زار زار ہوغارہ، خڑینک شولارہ۔ کنا ہم است خلکن مس، خن تیان خڑینک آک تمار۔ پدا کنے آن ہم سگنگ متو، تینا کسر ءِ ہلکٹ۔

اسہ پین ہندن ءُ کتاب آن کِسہ اس خواناٹ کہ اسہ چک اس رزق انا یعنی تینا و تینا چناتا کننگ کن دانہ بننگ کن بھاز بھلو سفر اس کرے، پدا بس تینا جاگہ یا ہنکین آ تو چناک تے پاریر لمہ جان نی داخس بھلو سفر اس کرینس، ننے ہم دیخ اس پا کہ آسمان اخس بھلن ءِ، تو لمہ جان تینا چناتے تینا پرہ غاتیٹ مہر اٹ ڈکا۔ چناتے مہر اٹ پارے ”دا ہیت ءِ کنا یات تخبو کہ لمہ جان و باوہ جان نا سیخا غان بیدس دنیا ٹی پین بھلو ہچ ءُ سیخا اس اف۔“

نن ہم ہندا دعا ءِ کین کہ ننا لمہ جان و باوہ جان مدام سلامت مریر، اوفتیان دعا ہلین ننا سیخاک دا دنیا نا ہندادو پین نن کن دافتا وڑ کس اس است ہشوک ءُ اف۔

ننا دعاءِ ننا سیخاک مدام سلامت مریر۔

کرک لمہ دعا داسہ

سلامت کے مدام مولا

ہفتئی تلار

13-19 June 2020

تاک، 23

پنہ : 06