پی پی راہشون ڈاکٹر آیت اللہ درانی کزیت کرے

کوئٹہ (تلار حوالکار) پاکستان پیپلزپارٹی (پی پی پی) نا راہشون و مسکوہی وزیر مملکت ڈاکٹر آیت اللہ درانی کزیت کرے۔ سرجم حوال آتا رد اٹ ڈپٹی میڈیکل سپرٹنڈنٹ (ڈی ایم ایس) فاطمہ جناح اسپتال کوئٹہ ڈاکٹر صادق بلوچ پارے کہ ڈاکٹرآیت اللہ درانی بھاز ناجوڑ ئس۔ آیت اللہ درانی 2008ءنا گچین کاری تیٹی مستونگ آن پی پی نا ٹکٹ آ قومی اسمبلی نا باسک گچین مس، و 2011ءاسکان یوسف رضا گیلانی نا کابینہ ٹی وزیر مملکت صنعت و پیدوار ئس۔ او پنی آ براہوئی نوشتکار مولانا محمد عمر پڑنگ آبادی نا مار ئس، آیت اللہ درانی نا جند ہم زبان و ادب تون مہر تخوک ئُ بندغ اس ئس۔ ایلو پاکستان پیپلزپارٹی نا صدر آصف علی زرداری آیت اللہ درانی نا کزیت آ است ہسونی نا درشانی کرینے، او پارینے کہ آیت اللہ درانی پارٹی نا نظریاتی و وفادار ئُ کارندہ اس ئس۔ اونا کزیت پارٹی و بلوچستان کن بھلو نسخان اسے۔ ہندن وزیر اعلیٰ بلوچستان جام کمال خان ہم آیت اللہ درانی نا کزیت آ ہڑزخواہی کرینے، و پارینے کہ او مدام اصولی سیاست کرے۔ و بلوچستان نا ویل آتے پیدوار کننگ کن تینا کڑد ئِ ادا کرسا ہنا۔