ڈاکٹر آتا سیکورٹی نا بابت سندھ اسمبلی ٹی بل اس پیش کننگک، بلاول بھٹو

کوئٹہ (آن لائن) پاکستان پیپلز پارٹی نا چیئرمین بلاول بھٹو زرداری بنجاہ، پنجاب،سندھ و بلوچستان نا حکومت آتیان خواست کرینے کہ محکمہ جانجوڑی نا بڑزکو کمامدار آتیان ہلیس کلاس فور نا ملازم آتسکان رسک الاﺅنس منظور کننگے، ڈاکٹر آتا سیکورٹی نا بابت کانود سازی کن سندھ اسمبلی ٹی بل اس پیش کننگک، کورونا اسہ جہانی ءُ دَین اسے ہراڑکن ننے کل ءِ اواری ٹی کاریم کننگ نا گرج ءِ، آزاد کشمیر اٹ ڈاکٹر آتیا لاٹھی چارج نا مذمت ءِ کینہ، حکومت زوت اس ڈاکٹر آتا جائز انگا ویل آتے ایسر کننگ کن گام گیج کے۔ دا خیال آتا درشانی ءِ او آل پاکستان ینگ ڈاکٹر آتا کمبائن چیپٹر آتون اڈ ہلوک آن لائن میٹنگ نا وخت آ تینا خیال آتا درشانی ءِ کرسا کرے او وخت آ ینگ ڈاکٹر آتا نمائندہ ڈاکٹر یاسر اچکزئی ڈاکٹر وارث جھکرانی ،ڈاکٹر عطاءمروت،ڈاکٹر عمر ،ڈاکٹر حنیف لونی،ڈاکٹر رحیم خان بابر و ایلوفک ساڑی ئسر، ڈاکٹر آتا کنڈآن پیپلز پارٹی نا چیئرمین ءِ مچ آ ملک اٹ کورونا وائرس نا حالیت و دا بابت اٹ ہسپتال آتا حالیت و ڈاکٹر آتے دوئی ویل آتا بارواٹ جوان وڑاٹ بریفنگ تننگا۔ ینگ ڈاکٹر بلوچستان نا کنڈآن پاننگانے کہ بلوچستان نا اِرا ملک آتون بارڈر آک ءُ، داڑے حالیت آک خراب اریر، حکومت بلوچستان نا کنڈآن ہرا ڈاکٹر آتے تعینات کروئی اوفتے آ دا وخت اسکان عملدرآمد مننگ کتنے۔ 14سو نا کچ اٹ ڈاکٹر آتے زوت اس بھرتی کرسا کورونا وارڈ آتون اوار مچ آ صوبہ ٹی تعینات کننگے تانکہ اوفک صوبہ ٹی کورونا ناجوڑ آتا درمان اٹ کمک کننگ کیر او وخت آ بلاول بھٹو زرداری آجو کشمیر اٹ وائے ڈی اے نا ڈاکٹر آتیا حکومت نا کنڈآن لاٹھی چارج نا مذمت ءِ کرسا پاننگ ئس کہ ڈاکٹر آتا جائز انگا ویل آتا ایسری کن حکومت گام گیج کے نہ کہ ڈاکٹر آتیا لاٹھی چارج کے۔