ہزار ناجوڑ آتے مالی کمک فراوان کننگانے، اسداللہ بلوچ

اسلام آباد (اے پی پی) بلوچستان نا وزیر راجی آسراتی و غیر رسمی تعلیم اسد اللہ بلوچ پارینے کہ صوبائی حکومت بلوچستان عوامی انڈوومنٹ فنڈ(بی اے ای ایف) پروگرام نا رداٹ 1000نیزگار ناجوڑ آتے مالی کمک فراوان کرینے۔ ”اے پی پی“ تون گپ وتران کرسا اوپارے کہ ساڑی مالی سال اٹی بھلا ناجوڑی تے ٹی اختہ نیزگار الس ءِ جانجوڑی نا گچین آسراتی تا فراوانی ءِ پک کننگ کن اسہ بلین روپئی خڑچ کننگ انگ ءِ۔ وزیر مملکت پارے کہ دا کمک بی اے ای ایف گام گیج انا رداٹ چندی بھلا ناجوڑی تیٹی اختہ نیزگار و نادار ناجوڑ آتے مچ آ ملک انا گچین سرکاری و نجی بشخ انا ہسپتال آتیٹی اوفتا درمان ءِ کرفنگ کن مالی کمک فراوان کننگ کن کوشست کننگ ءِ۔ اومستی پارے کہ میڈیکل بورڈ میرٹ نا بنداو آ غٹ درخواست آتا منظوری ءِ تسنے۔ اسد اللہ بلوچ پارے کہ دا گام گیج سویلی ایشیاٹی غٹ آن گچین فلاحی پروگرام نا اولیکو پروگرام ءِ ہرا نغد زر گدریفنگ نا کمک اٹ ضرورت مند آتتون کمک کننگ ءِ۔ یات سلے کہ جغر و بک آتا پیوندکاری غٹ آن کبین انگا درمان ءِ ہراڑکن کروڑ آ روپئی درکار ئس۔ داکان بیدس صوبہ نا معذور و خصوصی بندغ آتا بحالی کن بی اے ای ایف اٹی 77 ملین روپئی جتا کننگانے۔