نتیجہ، کٹیا، ماحصل:۔ (پٹ و پول)۔۔۔۔
غفور جان ساسولی
Get real time updates directly on you device, subscribe now.
نتیجہ، کٹیا، ماحصل:۔ (Conclusion)
Conclusion، لاطینی لوز Conclusionem آن ہلنگانے، ہرانا معنہ نتیجہ، (سلاہ ئی بھرم) و بند کننگ نا ءِ۔
تحقیق نا پڑ آ دا مقالہ اسے نا ہمو گڈیکو بشخ مریک ہراٹی مقالہ نگار تینا نوشتہ کروک آ مقالہ نا بنداوی و خاص انگا ٹِک آتے بیان کننگ نا کوشست ءِ کیک، دن پا کہ دا اسہ وڑ اسے نا خلاصہ اس مریک، ہرا مقالہ نا بنا ٹی آخا، بلکن گڈیکو بشخ اٹی نوشتہ کننگک۔
’’نتیجہ‘‘ نا مسہ خاص ءُبشخ مریرہ:
-1 اولیکو بنا یا بنائی بشخ، ہراٹی مقالہ نا درستی راستی و اونا مسخت بیان کننگک۔
-2 ارٹمیکو بشخ پنجر Body or Structure پاننگک، ہرا مچ آ مقالہ نا خاص انگا بشخ اٹی حساب مریک۔
-3 مسٹمیکو بشخ اٹی ایسری بریک، ہرادے گڈیکو بشخ یعنی Conclusion پارہ۔ دا وڑ مقالہ اسُل پورو مریک۔ و داٹی کٹیا دوئی مریک، ہرادے ’’ماحصل‘‘ ہم پارہ۔
تحقیق اٹی دا نتیجہ خوانوک آ ءِ پہہ مننگ کن مدت و کمک ایتک، کہ دا تحقیق امر و ہرا وڑ کننگانے؟ دانا انت ضرورت و اہمیت ارے؟
مقالہ اسے ٹی نتیجہ ہمو ٹک آتا خاصہ ءِ بیان کیک، ہرا ویل آتا گدرینگوک آ باب آتیٹی درشانی ءِ کننگانے۔
ہندن ہراڑے بیرہ اونا خاص گرج والا مسخت ءِ پاش کروئی ءِ، تاکہ خوانوک آ یا پوسکن ءُنوشتوک اس تین کن داڑان گڑاس ہلنگ کے۔
تحقیق اٹی نتیجہ نا گرج:۔
تحقیق اٹی نتیجہ نا انت ضرورت ءِ؟ دا اہم ءُسوج اسے۔ پٹ و پولی آ تحقیق اٹی اول سر آن گڈسر اسکان اسہ سجفوک ءُسرحال اسے نا رد اٹ مقالہ اسے نا مچ آ ہاٹی اسہ خاص ءُرد و بند اسے ٹی نوشتہ مریک۔
مقالہ نا اصل دلیل تون اونا گڈیکو بشخ (ماحصل) اٹی درشان مریک۔ ہندا ڈَول دا دلیل خوانوک آ ءِ اول آن اخیر اسکان تین تون گون تخک، تاکہ ہندا دلیل شاہدی نا وڑ مقالہ ٹی پک مننگ کے، کہ تحقیق نا آب اخس ءِ؟
……
کتاب آک:۔
احمد، کلیم الدین، (1968)، ’’فرہنگ ادبی اصطلاحات‘‘ ترقی اردو بیورو، نئی دہلی
اشرف، محمد خان، (2017)، ’’اصطلاحات‘‘، سنگ میل پبلی کیشنز لاہور
جین، گیان چند، (2014)، ’’تحقیق کا فن‘‘، فکشن ہائوس لاہور
ہفتئی تلار
تاک:05
29جنوری، 04 فروری 2022ء
پنہ: 04