ریکوڈک آ وزیر اعلیٰ و صوبائی حکومت نا موقف ستا کڑزک، برطانوی ہائی کمشنر

کوئٹہ : وزیراعلیٰ بلوچستان میر عبدالقدوس بزنجو و برطانوی ہائی کمشنرڈاکٹر کرسچئن ٹرنر نانیام اٹ مروک اوڑدہی ٹی بلوچستان نا چندی بشخ آتے ٹی برطانیہ ناکمک وزرکاری ءِ ودفنگ نا بابت امورتیا ہیت وگپ کرسا فیصلہ کننگانے کہ بلوچستان بورڈ آف انویسٹمنٹ اینڈ ٹریڈ وبرطانوی ڈپٹی ہائی کمشنر ٹریڈ نانیام اٹ رابطہ غاتے ودفسا داامور تے پک دروشم تننگک۔ صوبائی وزیر نور محمد دمڑ، سردار عبدالرحمن کھیتران و سید احسان شاہ ہم دا وخت آساڑی ئس‘ وزیراعلیٰ بلوچستان و صوبائی وزیر تاکنڈآن بلوچستان اٹ زرکاری نا وارخواہی و تین پہ تینی کمک ءِ ودفنگ نا بشخ آتا نشاندہی کننگا وپاننگا کہ صوبہ ٹی پیشن نا زرکاری ءِ صوبائی حکومت اولیت ایتک ہراڑکن زرکار آتے پرامن و گچین چاگڑد نافراوانی ءِ پک کننگانے۔ وزیراعلیٰ ناکنڈآن برطانوی ہائی کمشنر ءِ ایلو امور تتون اوار ریکوڈک ڈٹ آ مروک پیش رفت آن ہم آگاہ کننگا۔ برطانوی ہائی کمشنر ریکوڈک ڈٹ آ وزیراعلیٰ بلوچستان و صوبائی حکومت ناجیرتی آ موقف ناستاءِ کرسا پارے کہ ریکوڈک ڈٹ آ کاریم نادوارہ بنا غان پیشن نا زرکارآتا بلوچستان اٹ زرکاری کننگ کن پت سوگو مریک و او دا کنڈآ مون کننگ کیرہ ہرافتے ٹی برطانوی کمپنیک ہم اوار مریرہ و اینو نا اوڑدہی نا بابت برطانوی ڈپٹی ہائی کمشنر ٹریڈ نا کمک اٹ برطانوی زرکار آتے بلوچستان نا چندی بشخ آتے ٹی زرکاری نا گمان و وارخواہی تیان آگاہ کننگک۔ برطانوی ہائی کمشنر پارے کہ پاکستان و برطانیہ نا نیام اٹ رابطہ غاک تاریخی ءُ ہرافتیا نن گمر کینہ و اسہ وتواجہ پاکستان تون کمک ءِ ودفنگ ننا حکومت نا اولیت آتے ٹی اوار ءِ۔ او پارے کہ دا وخت آ برطانیہ ناکنڈآن پاکستان ءِ ڈی ایف آئی ڈی و یو کے ایڈ انا رداٹ تعلیم، جانجوڑی‘چاگڑدی بدلی‘ تعلیمی وظیفہ‘ مسن تاتعلیم و لمہ وچنانا جانجوڑی بشخ آتے ٹی کمک تننگ انگ ءِ وخت اس کہ برطانیہ نا دوسَد آن زیات کمپنی پاکستان اٹ زرکاری کننگ اٹی ءُ۔ او بلوچستان اٹ امن وایمنی نا حالیت آتے است جمی نا سوب گوندسا تین پہ تینی کمک و زرکاری ءِ ودفنگ اٹ استخواہی تا درشانی کرے۔ او باور کرفے کہ پرامن شونہال و شون ہلوک بلوچستان کن جانجوڑی‘ تعلیم‘ چاگڑدی بدلی، کشت وکشار‘ مالداری‘ ماہی گیری و معدنیات نا بشخ آتے ٹی کاریم نا واکداری کچ ءِ ودفنگ و سروس ڈیلوری سسٹم نا گچینی نا ڈٹ آتے برطانوی کمکی پروگرام تے ٹی اوار کننگک وخت اس کہ پبلک پرائیویٹ پارٹنر شپ، بی او ٹی و بزنس ٹو بزنس موڈ انا رد اٹ بلوچستان اٹ زرکاری نا شونداری کن کمک فراوان کننگک۔

(خ ن)