پاکستان اسٹرٹیجک پارٹنر ءِ، تعلقداریک اہم ءُ، امریکہ

واشنگٹن : امریکی محکمہ خارجہ نا ترجمان پارینے کہ پاکستان امریکہ نا اسٹریٹجک پارٹنر ءِ و حکومت پاکستان تون امریکہ نا تعلقداریک اہم ءُ ‘ نن پاکستان تون چندی بشخ آتے ٹی تعلقداری تے اولیت ایتنہ۔ امریکی محکمہ خارجہ نا ترجمان نیڈ پرائس پریس بریفنگ اٹ پارے کہ نن یواے ای و سعودی عرب نا رکھ ءِ سوگو کننگ کن پرعزم ان‘ ہڑتوم آ ملک آتتون سکیورٹی کمک‘ دفاعی واپاری و ہیلکاری آ کاریم کننگ اٹی ان‘ ترجمان پارے کہ یمن نا جھیڑہ ءِ چٹفنگ نا اسٹ انگا کسر سفارتی ءِ وخت اس کہ ایران نا جوہری پروگرام اٹ پیشرفت آ ننا گڑتیک اریر‘ ترجمان امریکی محکمہ خارجہ پارے کہ پاکستان امریکہ نا اسٹریٹجک پارٹنر ءِ و حکومت پاکستان تون امریکہ ناتعلقداریک اہم ءُ۔ ترک صدرنا یوکرین نادورہ نا بابت سوج آ امریکی ترجمان پارے کہ ترکی نیٹو نا اہم ءُ سیوتی اسے‘ یوکرین تون یکجہتی کروک نیٹو سیوتی نا کوشست آتا مخ تفی ءِ کینہ۔ اوغانستان نا بابت نیڈ پرائس پارے کہ نن کیہی وڑ اٹ اوغان الس تون کمک کننگ اٹی ان‘ نن اوغان الس نا انسانی گرج آتے ٹی اوفتتون کمک کننگ ان۔

(آن لائن)