پی ایف ایف نا فٹبالر آتا ویل آتے بننگ کن آن لائن سیشن‘ مالی ویل و لیگ انا وڑ و ڈول آ ہیت وگپ

 لاہور (مانیٹرنگ ڈیسک) پاکستان فٹبال فیڈریشن (پی ایف ایف) قومی فٹبالر آتا ویل آتے بننگ کن آن لائن سیشن کرے، ہراٹی قومی فٹبالر آک انفرااسٹکچر، مالی ویل و لیگ انا وڑ و ڈول آتا تینا خیال آتا درشانی ءِ کریر، گوازی گر ایلو فٹبال نا گوازی گرتیکن سینٹرل کنٹریکٹ نا ہم سلاہ تسر۔ پی ایف ایف نارملائزیشن کمیٹی نا کماش حمزہ خان پاکستان نا نرینہ و نیاڑی تا ٹیم نا گوازی گرتتون آن لائن میٹنگ کرے، ہراٹی گوازی گرک انفرااسٹرکچر، پروفشنل ازم نا کاختی، مالی ویل و پراپر لیگ مفننگ نا غاو ءِ کریر او جتا جتا سلاہ پیش کریر۔ کلیم اللہ قومی فٹبالر آتیکن سینٹرل کنٹریکٹ نا سلاہ ہم تس۔ پی ایف ایف ترجمان نا رداٹ نارملائزیشن کمیٹی نا کماش حمزہ خان گوازی گر تے پارے کہ ہرا غاو شارٹ ٹرم ویل آتون گنڈوک ءُُ اوفتے زوت اس ایسر کننگ نا کوشست کننگک وخت اس کہ لانگ ٹرم ویل آتیکن گچین آ باڈی ءِ کڑد ادا کروئی تمک۔ میٹنگ اٹ نیاڑی گوازی گرک غاو کریر کہ نیاڑی فٹبال آ سجفنگ نا کمتی ءِ۔ ہراڑا حمزہ خان گوازی گرتے پارے کہ پی ایف ایف نیاڑی فٹبال اٹ ہم پروفیشنل لیگ مون آ اتنگ اٹی ءِ ولے کورونا وائرس نا سوب آن پلان ءِ کینسل کروئی تما۔