چیف جسٹس فل کورٹ جوڑ کے، جتا مروک آتے پدی اتنگپ، وزیراعظم

اسلام آباد : وزیراعظم شہباز شریف پارینے کہ سیوتی حکومت ساڑی بنچ آ بے پتی نا درشانی ءِ کرینے‘ چیف جسٹس فل کورٹ جوڑ کے و تینٹ جتامروک جج آتے دوارہ اوار کننگپ تو فیصلہ ءِ مچ آ قوم امنا کیک۔ قومی اسمبلی نا دیوان اٹ تینا خیال آتا درشانی ءِ کرسا وزیراعظم شہبازشریف پارے کہ سیوتی جماعت آتا دیوان اٹ فیصلہ مسوسس کہ ساڑی بنچ آ بے پتی درشان کننگک‘ بائیکاٹ نا لوز کاریم اٹ اتنگتو۔ سپریم کورٹ نا جج جسٹس اعجاز الاحسن تینٹ بنچ آن جتا مسوسس او امر بنچ اٹ تولنگ کیک؟شہباز شریف پارے کہ مچ آ سیوتی حکومت ساڑی بنچ آ بے پتی نا درشانی کرینے‘ وخ کہ اینو ہم چیف جسٹس فل کورٹ تولفے و ہرا جج آک تینٹ جتا مسنو اوفتے اوار کپ تو دا وڑ انا فیصلہ ءِ مچ آ قوم امنا کیک‘ ساڑی بنچ آن فیصلہ کرفنگ انصاف نا اصول آتیان چَپ ءِ‘ بنچ اٹ اوار اسہ جج اسے بھلو دوبہ ارے‘ کرپشن نا دوبہ والا جج ءِ بنچ اٹ اوار کرسا چیف جسٹس انت کلہو تننگ خواہک‘ اوپارے کہ ای منہ دے مست ایوان ءِ تینا حقی آ ہیت آتیان معلومدار کریٹ‘ چیف جسٹس سماعت نا وخت آ ریمارکس تس کہ اسمبلی ٹی کیہی بندغ آک ہرا جیل مسنو اسمبلی ٹی تران کننگ اٹی ءُ‘ نظریہ کن بندی مننگ آن تاریخ شُپ ءِ‘ ای کریمنل کیس اٹ بندی متنٹ۔ او ایوان ءِ پارے کہ عمران نیازی تون کننگ کن یین کاریم الو‘ عمران نیازی تون بیرہ اسہ سوچ اس ئس کہ ہرا وڑ اپوزیشن ءِ جیل کننگے۔ عمران نیازی کنے اِرا وار جیل آ راہی کرے و مسٹمیکو وار پورو تیاریک ئسر‘ اولیکو جیل مسٹ تو ہائیکورٹ کنے میرٹ آ ضمانت تس‘ عمران خان اودے سپریم کورٹ اسکان چیلنج کرفے‘ ارٹمیکو وار عمران نیازی نیب انا کمک اٹ کنے جیل آ راہی کے‘ کنا ڈوہ دا ئس کہ ای قائد حزب اختلاف ئسٹ‘ کنا ڈوہ دا ئس کہ ای عمران خان نا غلط کاریم تا برخلاف پارلیمنٹ اٹ توار چست کریٹہ‘ اینو ای اگہ دا ایوان اٹی اٹ تو مگہ دا بے شرفی نا ہیت اسے۔ داکان مست وزیراعظم محمد شہباز شریف پارینے کہ نن مدام ملک ءِ مشکل حالیت آتیان کشان، ہندن ءُ وخت اس بریک کہ حالیت آک بدل مریرہ دا کنا ایمان ءِ، آئی ایم ایف نا آخیریکو شڑت آ گپ وتران برجاءِ، عمران خان پاکستان ءِ زرگزرانی مین اٹ گٹ کرے، سنگت ملک آتا برخلاف مسکوہی حکمرانک بدزبانی کریر، تدوک آ حکومت نا آئی ایم ایف پروگرام نا سوب آن کبینی نا ریسہ غاک بننگ اٹی ءُ۔ دوشنبے نادے آ مسلم لیگ (ن) نا میڈیا سیل آن جاری بیان نا رداٹ وزیراعظم شہباز شریف نا کماشی ٹی مسلم لیگ (ن) نا پارلیمانی پارٹی نا دیوان پارلیمنٹ ہاؤس اٹی اڈ ہلک۔ وزیراعظم پارے کہ نن مدام ملک ءِ مشکل حالیت آتیان کشان، حالیت آک گھمبیر ءُ ولے ننا نیت ساف ءِ، انشاء اللہ حالیت آک گچین مریرہ، کنا ایمان ءِ کہ ہندن ءُ وخت اس بریک کہ حالیت آک بدل مریرہ۔ اوپارے کہ آئی ایم ایف بنجائی حکومت نا دوتے نت تے تفینے، آئی ایم ایف نا پیشگی شڑت آتے مننگانے، تدوک آ حکومت نا آئی ایم ایف پروگرام نا سوب آن کبینی نا ریسہ غاک بننگ اٹی ءُ، آئی ایم ایف نا آخیریکو شڑت آ گپ وتران برجاءِ۔ اوپارے کہ 10 کروڑ نیزگار خاہوت آتے مفت نت فراوان کننگ نا بناءِ کرین، پنجاب، خیبرپختونخوا و اسلام آباد اٹی نیزگار آتے روچہ ٹی مفت نت تننگ اٹی اُن۔

(مانیٹرنگ ڈیسک/ اے پی پی)