پاکستان چین اتون پین صنعتی کمکاری نا خواہندار ءِ، احسن اقبال

اسلام آباد: بنجائی وزیر ڈٹ بندی، شونداری و خصوصی گام گیج پروفیسراحسن اقبال پارینے کہ چین پاکستان اقتصادی راہداری ڈٹ پاکستان اٹی بجلی نا تنکی نا مون ءِ توننگ اٹ کمک فراوان کرے، پاکستان چین اتون پین صنعتی کمکاری نا خواہندار ءِ۔ بنجائی وزیر ڈٹ بندی شونداری و اصلاحات و خصوصی گام گیج احسن اقبال دی باو فورم فار ایشیانا سالانہ کانفرنس 2023اٹی بشخ ہلنگ آن پد بیجنگ آ سرمس ہراڑے دوشنبے نادے آ او پاور چائنا نا صدر چان گوانفو تون اوڑدہی کرے۔ بنجائی وزیر سی پیک نا سرسہبی ٹی چینی کاروباری ادارہ غاتا کمکاری نا ستاءِ کرے۔ اوپارے کہ پاکستان نا مخلوق اسُل است آن دپک کہ چین اوفتا ہمووخت آکمک ءِ کرے ہراتم مچ آ ملک بجلی نا کاختی نا سوب آن تہاری تیٹی ڈبینگوک ئسک۔ سی پیک توانائی نا ڈٹ آتا کمک اٹ پاکستان تینا توانائی نا کمتی نا مون ءِ توننگ اٹ سرسہب مس۔ پاور چائنا نا پاکستان تون متکن آ سنگتی و پاکستان نا توانائی و انفراسٹرکچر ءِ ودفنگ کن کیہی اہم ڈٹ آتا بناءِ کننگانے ہرافتے ٹی پورٹ قاسم اٹی کولا آن چلینگوک آپاور پلانٹ، حویلی بہادر شاہ ٹی ٓرایل این جی پاور پلانٹ و داؤد پاور پروجیکٹ اوار ءُ۔ اوپاور چائنا ءِ شمسی توانائی ٹی زرکاری نا سلہ خلک ہراڑکن حکومت 10،000 میگاواٹ بناکننگ کن خصوصی گام گیج کننگانے۔ اوپاور چائنا ءِ حکومت نا کنڈآن ڈٹ آتیا عملدرآمد و غٹ ویل آتا ایسری کن پورو آسراتی فراوان کننگ نا باوری کرفے۔ اوکان پد چائنا روڈ اینڈ برج کارپوریشن نا چیئرمین مسٹر ڈوفی احسن اقبال تون اوڑدہی کرے۔ وزیر چین پاکستان اقتصادی راہداری نا اہمیت آ زور شاغا، ہراکہ بیلٹ اینڈ روڈ انیشی ایٹیو(بی آرآئی) نا اہم ڈٹ ءِ ہراکہ تدوک آ منہ سال اٹی پاکستان اٹی بنداوی پنجر ءِ سوگو و پوسکن کننگ اٹی ءِ۔ اوپاکستان نا راجی و اقتصادی شونداری ٹی رابطہ نا ڈٹ آتا کڑد ءِ مون آ تخا۔ دا چرجوئی ٹی، او 1996 ٹی کے کے ایچ نا تفنگ آن ہلیس 2017-18ٹی حویلیاں۔ تھاکوٹ موٹروے نا تفنگ اسکان پاکستان اٹی اہم ٹرانسپورٹ و انفراسٹرکچر نا شونداری کن سی آر بی سی نا کمکاری نا اعتراف ءِ کرے۔ وزیر مجوزہ کراچی کوسٹل کمپری ہینسو ڈویلپمنٹ زون (KCCDZ)ڈٹ انا بناءِ کرے، ہراٹی کراچی ٹی 3 بلین ڈالر آن زیات نا زرکاری، بابو سرٹنل پروجیکٹ، نئی کراچی حیدر آباد موٹروے الائنمنٹ (M9)کن فزیبلٹی اسٹڈی و ایلو اہم پروجیکٹ آک اوار ءُ۔ وزیر دا پت انا درشانی ءِ کرے کہ دا ڈٹ سیل و سوات، آئی ٹی، بندرگاہ، جہاز رانی و خذمت آتیکن مون آ بروک آ مرکز نا وڑاٹ کاریم کیک انتئے کہ داڑان باصلاحیت ورناتیکن ہزار آ پوسکن آ ملازمت ہم ودی مریک۔ او سلاہ ئی ڈٹ آتا سرسہیب نفاذ کن حکومت نا کنڈآن پورو کمکاری نا باوری کرفے۔ بنجائی وزیر احسن اقبال چین و پاکستان نا نیام اٹ خصوصی سنگتی و آہنی ایلمی ءِ ہم مون آ تخا ہرا وخت اناآزمائشت و لازوال ءِ۔ اواومیت ظاہر کرے کہ دودوربیدگی ہن و بر ءِ مون آ دننگک و ننا ہڑتوم آ ملک آتا نیام اٹ مخلوق نا رابطہ غاتے مون آ دننگک تانکہ ننا سنگتی ءِ پین سوگو کننگ مرے و اسہ ایلو نا ملک آتا پبی تاریخ، قدرتی زیبائی و دودوربیدگی میرات ءِ پٹنگ کن گچین تفہیم ءِ مون آ دننگ مرے۔ چینی کمپنی نا نمائندہ غاک سی پیک ءِ سرسہب کننگ اٹ وزیر نا کمکاری نا ستاءِ کریر و سی پیک ءِ کمکاری نا بروک آ ریسہ ٹی دننگ اٹ پورو کمکاری نا باوری کریر،اوفک کمپنی نا گڑتی تے مر کننگ نا باوری کرفنگ آ وزیر نا منت واری ءِ ہرفیر۔ اوفک اودے باور کرفیر کہ وزیراعظم شہباز شریف جندی وڑاٹ سی پیک ڈٹ آتا پیش رفت نا چاروکی ءِ کننگ ءِ و پوسکن آ حکومت ہندا رفتار ءِ بحال کننگ کن سنبرینگوک ءِ ہرارفتار اٹ 2013-18آن سی پیک اٹ مون آ ہناکہ۔

(اے پی پی)