ذوالفقار بھٹو آئین تس، بلاول پرغنگ کن تے تولوک ءِ، تحریک انصاف

اسلام آباد : پاکستان تحریک انصاف نا راہشونک پارینو کہ ذوالفقار علی بھٹو آئین تس ولے بھٹو نا پن انا جانشین آئین ءِ پرغنگ کن تولوک ءِ‘ آئین آن بیدس ملک اٹ جنگل نا کانود مریک‘ دا حالیت ءِ پاکستان سگنگ کپک۔ سپریم کورٹ ناپیشن آ میڈیا تون ہیت وگپ کرسا او پارے کہ اسہ ٹولی آئین آجلہو کننگ اٹی ءِ تو ایلو تپّہ انصاف کن عدالت نا درگہ ءِ ٹکیفنگ اٹی ءِ۔ عدالت عظمیٰ آئین نا تشریح ءِ کننگ کیک‘ مچ آقوم جج آتتون یکجہتی نا درشانی کننگ اٹی ءِ‘ ہزار آتا کچ اٹ وکیل آک سپریم کورٹ اٹ ساڑی ءُ‘ آئین آن بیدس ملک اٹ جنگل نا کانود مریک‘ ہرادے پاکستان سگنگ کپک‘ او پاریر کہ ذوالفقار علی بھٹو آئین تس واونا نواسہ بلاول بھٹو آئین ءِ پرغنگ نا فیصلہ کرینے توسنے‘ اینو ذوالفقار بھٹو ناپن انا جانشینک آئین آ جلہو کننگ اٹی ءُ۔ ایلو کنڈآ تحریک انصاف نا راہشون فواد چوہدری پارینے کہ حکومت ہر مچی آن خلنگ اٹی ءِ‘ وکیل آتے سپریم کورٹ آ بننگ آن توننگ کن کسر بند کننگ نا ہچ گرج الو‘ وکیل آک اگہ آئین و سپریم کورٹ تون یکجہتی کننگ اٹی ءُ تو ریاست بایدے اوفتامنتوار مرے‘ ولے داڑے حکومت آئین آن خلنگ اٹی ءِ وعدالت ءِ کاریم آن توننگ اٹی ءِ‘ او پارے کہ تحریک انصاف ن لیگ نا پارٹی نا وڑ رجسٹریشن ءِ منسوخ کننگ کن ریفرنس آ سجفنگ اٹی ءِ۔ الیکشن ایکٹ نا خلاف ورزی ءِ کرسا اسہ نروک ءُ دوبہ دار اس دا پارٹی نا فیصلہ غاتے کننگ اٹی ءِ و پارٹی پڑو کرینے کہ او سپریم کورٹ ءِ منپک۔ دا پڑو تینٹ آئین نا آرٹیکل 6 آن چپ ءِ‘ او پارے کہ کنے آ 7 کیس ءُ ہرافتا ہچ ءُ تک اس اف‘ کنا برخلاف دہشت گردی نا برخلاف مقدمہ درج کننگا‘ حالانکہ ای لاہور اٹ الوٹ۔

(آن لائن)