براہوئی ادبی حوال(10)

عبدالقیوم بیدارؔ

0

Get real time updates directly on you device, subscribe now.

 

٭کوئٹہ نا متکن آ یات آک

٭ سید منصور بخاری نا یات اٹ ماتمی مُچی

٭متکن آ کتاب مرکز آک

اسہ زمانہ اسے ٹی کوئٹہ ٹی منہ کتاب مرکز ئسر ہرافتے ٹی ”قلات پبلشرز“، گوشہ ادب“، و ”کوئٹہ بک اسٹال“ پنی ئسر۔ دا کتاب مرکز آتے ٹی کتاب دوست آ بندغ آتا بھلو کچ اس بسکہ و کتاب ہلککہ۔ قلات پبلشرز، پنی آ سیاست دان نیشنل عوامی پارٹی نا ہمو وخت انا سینیٹر زمرد حسین نا ئسکہ ہراکہ پدآن عدالت روڈ آ اسہ پریس اس ہم جوڑ کرے، ہراکہ داسہ ہم کتاب شینک کیک۔ دا پریس آن براہوئی زبان نا پنی آ اخبارک ہم شینک مسرہ۔ قلات پبلشر نا دا مرکز اٹی بھاز وخت میر گل خان نصیرؔ، میر غوث بخش بزنجو، خیر بخش مری، عبدالصمد خان اچکزئی، رمضان بلوچ، نور محمد پروانہ، عبداللہ جان جمالدینی، ڈاکٹر خداداد، بہادر خان رودینی، جسٹس امیر الملک مینگل، سائیں کمال خان شیرانی، پروفیسر نادر قمبرانی، انجم قزل باش، محمد خان رئیسانی، پروفیسر خلیل صدیقی، عطاء شاد، ڈاکٹر تاج رئیسانی و ایلو سیاسی و ادبی شخصیت آک داڑے بسرہ و زمرد حسین تون مجلس کریرہ، و کتاب دریرہ۔ قلات پبلشر نا دا ہم اسہ جوانی اس ئس کہ اوفک بلوچستان نا زبان تا کتاب آتے ہم شینک کریرہ، ہرافتیٹی بلوچی، براہوئی اوار ئسر۔ اے زمانہ اٹی براہوئی و بلوچی اکیڈمی فنڈنگ نا رد اٹ نزور ئسر۔ وخت اس کہ داکان بھاز پنی آ کتاب آک ہم شینک مسنو۔ بلوچستان نا تاریخ نا رد اٹ شینک مروک آ کتاب آتا بھلو کچ اس قلات پبلشرز نا کنڈ آن اونا پریس آن شینک و تالان مسنو۔ دا گڑا دا ہیت انا شاہدی ءِ کہ قلات پبلشرز بلوچستان و اونا زبان تتون مہر کریکہ، و کیک۔ داسہ ہم۔ قلات پبلشرز اردو ٹی ہم بلوچستانی ادب ءِ مون آ دننگ اٹی بھلو کڑدار اس ادا کرے۔ ہمو زمانہ نا پنی آ ادیب و شاعر آتا کتاب آتے مفت شینک کریکہ ہرا کہ اسہ گچین ءُ گام اسے۔ یخین اٹ دا کتاب آتا شینکاری اونا زمواری اَلوکہ، ولے اونا دا جاگہ نا زبان تتون و دا جاگہ نا بندغ آتتون مہر دا گڑا غان پاش ئس کہ او بلوچستان نا سرحال آ بروک آ کتاب آتے مدام بخیر کریکہ۔ و خاص وڑ اٹ تاریخی آ کتاب آتا خڑچ آتے ہم تینا کوپہ غاتیا ہرفیکہ۔ 

ارٹمیکو کتاب آتا دکان ”گوشہ ادب“ ہراکہ جناح روڈ انا کنج اٹی ئسکہ، داڑے ہم پنی آ ادیب، شاعر و سیاست دان آک بسرہ و مجلس کریرہ۔ و کتاب ہلکرہ۔ گوشہ ادب نا مالک سید منصور بخاری ئسکہ، اونا ہم دا سیاست دان، شاعر و ادیب آتتون بھلو خڑکی اس ئسکہ۔ ہرانا سوب آن منصور بخاری ہم بلوچستانی ادب ءِ مون آ دننگ اٹی تینا بھلو کڑدار اس ادا کرے۔

منہ دے مست او کورونا ناجوڑی نا سوب آن دا دنیا ءِ الا۔ اونا یات اٹی پریس کلب اٹی اسہ ہڑزخواہی دیوان اس اڈ تننگا۔ دانا بست و بند ءِ بلوچی لبزانکی دیوان کریسس۔ دا مچی نا مہمان تیٹی مسکوہی وزیراعلیٰ جان محمد جمالی، ڈاکٹر نعمت اللہ گچکی، سرور سودائی، مسکوہی بنجائی وزیر چنگیز جمالی، سرور جاوید، وحید زہیر، شام کمار، ڈاکٹر لال محمد کاکڑ، شہزادہ ذوالفقار، یار جان بادینی و ایلوفک تران کرسا سید منصور بخاری نا زند و بُود و اونا کتاب دوستی و بلوچستان نا مخلوق و ادب نا شونداری کن اونا خذمت آتے پیدوار کریر کہ دن اِنگا ادب دوست آ بندغ آک بھاز وخت آن پد ودی مریرہ۔ و دافتا مٹ اف۔ ہندن بندغ آتا ساڑی گری قوم و زبان نا شونداری ٹی بھلو کڑدار اس ادا کیک۔ اوفک پاریر کہ منصور بخاری و اوفتا خاہوت کتاب آتا رد اٹ شعور آگہی ودی کرسا گچین ءُ خذمت کننگ اٹی ءِ۔ دا وخت آ اوفک اسہ پین کتاب مرکز اس سیل اینڈ سروسز نا پن اٹ ملانو، ہراٹی ادبی، سیاسی، ربیدگی، اسلامی، زرگزرانی، فلسفہ و بلوچستان نا سرحال آ بھازانگا کتاب آک رسینگرہ۔ داسہ ہم دا کتاب مرکز اٹی ادیب، شاعر، سیاست دان و کتاب دوست بندغ آک بریرہ و کتاب ہلیرہ۔ ای گیشتری سید منصور بخاری تون توسٹہ مجلس کریٹہ او براہوئی کتاب مرکز کن کتاب آتا رد اٹ بھاز جوانی کرے و کتاب آتے نیم نرخ آ ننے تسکہ۔ ای وخت وخت ہناٹہ اوڑتون مجلس کریٹہ۔ اسہ دے اس او مجلس کرسا پارے کہ بلوچستان نا پنی آ سیاست دانک داڑے بسرہ و کتاب ہلکرہ۔ اوفتیٹی سردار عطاء اللہ مینگل، نواب غوث بخش رئیسانی، نواب اکبر بگٹی، نواب خیر بخش مری، عبدالصمد خان اچکزئی، میر گل خان نصیرؔ و ایلو بلوچستان نا پنی آ سیاستدان و ادیب آک بسرہ۔ او گیشتری جناح روڈ آ شام انا وخت آ تنیا چرینگاکہ۔ گڈسر اٹی سید منصور بخاری نا مار ءِ کتاب آتا ٹیکی تننگا۔

ہفتئی تلار
تاک: 40
17-23 Oct, 2020
پنہ: 04

Get real time updates directly on you device, subscribe now.

Leave A Reply

Your email address will not be published.