سیرت سرور کائناتؐ(17)

فیل انا سال واقعہ ابرہہ نا بیت اللہ نا دڑفنگ کن مکہ غا جلہو

مُلحِد آتا بادشاہ تے بیت ربی آن چِڑ ئس

اونا شان ءِ کم امر کین اوفتا یکّا دا مِڑ ئس

دے نہ دے اس دا عرب ءِ مُچ کرو ءِ شان اتو

لا شریک آ رب ءِ چاہور او مرور ایمان اتو

شاہ حبش نا کنڈ آن کوشش جاری ئسک دم دم آ

اونا مرکز و کلیسا ئسکہ شارِصفا

خواہسکہ حج مرے دا کل عرب دانگ مون کے

اِلّے بیت ءِ او خدا نا تینے نن تون گون کے

دا خبر بنو کنانہ غا ہراتم سر کہ مس

او کلیسا غا صفا نا مون تِسُر بندغ اس

پاریر ہِن نی قبلہ ءِ تا رِیخ اتون رسوا کرک

شان بھلّن بیت انا ءِ اوڑکن پیغام اس تِخک

دُن کہ مسک شاہ حبش ہم ابرہہ ءِ مون تِس

پارے کعبہ ءِ دڑفبو فوج ءِ دا وڑ شون تِس

شست ہزار نا فوج اوڑتون پیل تخوک آ لشکر ئس

بیت ربی ءِ دڑفون دُن کروٹ ای دمچر اس

مُزدلفہ و منیٰ نا نیام اٹی کرے پڑاؤ

سد ہُچ اس او مُطلب نا پدا خلکک چَپاؤ

بِنگ قریش تو مکہ ءِ زو اس پدا خالی کرے

پارے پُجک دیر اوڑتون رب ننا وار آ برے

ایتے ہُچ آتے ننا نی بیت چاہے چاس نی

چاہے اللہ و اُرا تے پین انت اس خواس نی

بِنگ کلہو ءِ ابرہہ دا خوش مسک بے شمار

داسہ اللہ نا اُرا ءِ ای دڑفوٹ بے توار

او مُطلب نا دا بگ ءِ زو پدا واپس کرے

خنپر او دے بیت ربی نا نشان ءِ دے مرے

بس خدا نا ذات باری جوش اٹی دا حالت آ

رحم بسک وا رحیم ءِ دُن عرب نا حالت آ

ای خدا تینٹ نگہبان دا اُرا نا مسنٹ

شان والا ای قہار اٹ دُن غضب اٹ بسنٹ

تینا غیب آن وَلّر اس او چُک انا راہی کرے

خوڑت کیرے تا پُگ آنبار کس کنا بیت آ برے

نت و سُنٹ اٹ او دسیر ژل ابرہہ نا لشکر آ

فوج پیل آک دُن گرینگار بیت ربی نا رہ آ

پارے اللہ زو قریش ءِ دن ءُ شان اس تیوہ ای

دا بدی تے جاہلی تے اوفتیان مُر کیوہ ای

ای قبولی تسنٹ دا ابراؑہیم ءِ وعدہ اس

نا ای اولیاد آن ایتوٹک آخری شہزادہؐ اس

مکہ غان اونا تجلی مُچ آ دنیا ءَ ہلو

لاشریک یکتا ءِ اللہ راز ءِ دا کُلّ آ مَلَو

پنجا دے مست واقعہ دا خواجہؐ نا پیدائش آن

دُن تدینگار مکہ والاک پیل انا آزمائش آن

ہفتئی تلار
تاک: 40
17-23 Oct, 2020
پنہ: 05