اصطلاحات نثر(36)پٹ و پول

براہوئی لہجہ غاک:۔ (Brahui Dialects)

براہوئی زبان ءِ مسہ بنداوی لہجہ غاتیٹی بشخ کننگانے، ہرا چندی علاقہ غاتا رد اٹ ارے دن کہ:

1- سراوانی (ساراوانی) لہجہ

2- جہلوانی (جھالاوانی) لہجہ

3- رخشانی (رشخانی) لہجہ

1- سراوانی لہجہ: براہوئی زبان نا دا لہجہ ٹی کوئٹہ، مستونگ، کچھی (بولان)، قلات بریرہ۔

2- جھالاوانی لہجہ:۔ داٹی خضدار، وڈھ، لسبیلہ، آواران، حب بریک۔

3- رخشانی لہجہ:۔ رخشانی لہجہ ٹی نوشکے، چاغی، خاران، تربت، پنجگور، واشک بیسیمہ غان بیدس ایران، اوغانستان و ترکمانستان ہم بریک۔

اگہ نن براہوئی زبان نا چارمیکو لہجہ سندھی یا جٹکی لہجہ ءِ پان تو دا غلط مفرو ءِ، انتئے کہ دا لہجہ سندھی آن خڑک ءِ، ایہن تو جھالاوانی لہجہ ہم سندھی لہجہ غان متاثر خننگک، ولے ہرادے نن سندھی یا جٹکی لہجہ پاننگ کینہ اونا خڑکی سندھی تون جھالاوانی لہجہ غان ہم زیات ءِ۔ بلوچستان نا جہاندم اٹی خضدار تون اونا دے ٹِکی نصیر آباد نا علاقہ غاک بریرہ۔ ہرا ہڑتوم آ کنڈ آن سندھ آن خڑک لگرہ۔دا علاقہ نا باتی تا لہجہ جٹکی پاننگ مریک۔

دا بڑز انا لہجہ غاتیان بیدس مننگ کیک، کہ براہوئی نا پین ہم لہجہ مریر، ہرافتے لسانیات نا ماہر آک مون آ اتنگ نا کوشست ءِ کیر۔

تہذیب:۔ (Civilization)

سویلائزیشن لاطینی لوز civilis یا civlas آن ہلنگانے، و دانا معنہ ”شاری“ نا ءِ۔ انگریزی ٹی کاریم اٹ اتنگوک لوز Civil فرانسیسی زبان نا لوز Cisis آن بروک ءِ، ہرا کہ ”شاری مخلوق“ کن پاننگک۔ ہندا ڈَول انگریزی زبان اٹی ”تہذیب“ کن Culture نا اصطلاح کاریم اٹ اتنگک۔ و Culture بنداوی وڑ اٹ لاطینی لوز اسے، و داڑکن کشت و کشار، شار انا ہی، ابریشم نا پُوک، کچک، بیکٹریا تا ولفنگ، جسمانی یا کہ ذہنی اصطلاح و شونداری نا لغوی معنہ کاریم اٹ اتنگانے۔

عربی، فارسی و اردو ٹی ”کلچر“ کن لس وڑ اٹ ”تہذیب“ نا لوز کاریم اٹ اتنگک۔

پنی آ ادیب سبط حسن تینا کتاب ”پاکستان میں تہذیب کا ارتقاء“ ٹی تہذیب نا لغوی معنہ نا رد اٹ نوشتہ کیک:

”تہذیب کے لغوی معنی کسی درخت یا پودے کو کاٹنا، چاٹنا، تراشنا، تاکہ اس میں نئی شاخیں نکلیں، اور نئی کونپلیں پھوٹیں۔ فارسی میں تہذیب کے معنی ہیں آراستن پیراستن، پاک و دوست کردن و اصلاح نمودن کے ہیں۔“ (حسن، 2017ء، 18)

گچین آ تاریخ دان ویل ڈیورانٹ تہذیب نا چندی پالو تیا کڑمب ءُ وڑ اسے ٹی شرہ کرینے۔ و ہندا نیام اٹی او تہذیب نا راجی قدر انا رد اٹ تہذیب نا مسہ ٹک آتے خاص گوندک، و اوفتا جتا جتا بشخ آتیٹی درشانی ءِ کیک:

”-1 شکار آن کشت و کشار اسکان انسان نا زند۔

-2 کارخانہ غاتا بنداو 

-3 زرگزرانی نظام 

ہندن او تہذیب نا سیاسی سوب آتیٹی ہم مسہ خاص ءُ ٹِک انا ہیت ءِ کرینے، ہرا بنداوی اہمیت تخرہ، دن کہ:

-1 ریاست

-2 کانود

-3 خاہوت

تہذیب نا اخلاقی پالو یا عنصر تا سوب ءِ دن بیان کیک:

-1 برام

-2 جنسی اخلاقیات

-3 راجی اخلاقیات

-4 مذہب

اخیر اٹی تہذیب نا ذہنی سوب آتیٹی قدرت نا خاص انگا ٹک آک دن کہ:

-1 نوشت

-2 سائنس 

-3 آرٹ۔“ (خلیل، 2012ء، 37)

حسن، سبط، (2017ء)، ”پاکستان میں تہذیب کا ارتقاء۔“ 

حنیف، خلیل، (2012ء) ”پاکستانی زبانوں کا تہذیب مطالعہ“ غزنوی پبلشرز کوئٹہ

ہفتئی تلار
تاک: 40
17-23 Oct, 2020
پنہ: 06