فیڈل کاسترو (9)

Fidel Castro 

History will Absolve Me

”تاریخ کنے بری کرو!

شرف مند آجج صاحب آک!

ہچ ءُ وکیل اسے داخہ در مشکل حالیت آتیٹی تینا کسب نا پریکٹس ءِ دن کروئی تمتنے۔ وخت اس ہم اسٹ اسے آ دوبہ خلوک آ بندغ نا برخلاف داخہ در بے وڑی کننگتنے۔ دا کیس اٹی وکیل و مدعا علیہ ہڑتوم آک اسٹ ءُ۔ اٹارنی نا وڑ اٹ اودے ڈوہ بیٹی آ اسہ نظر اس ہم شاغنگ نا وار ملتو۔ دوبہ دار نا وڑ اٹ گدرینگوک آ 76 دے آن اودے تنیا بند کننگانے، و ہر انسانی و کانودی حق انا خلاف ورزی ءِ کرسا اودے داخس تنیائی ٹی تخنگانے۔ 

ہمو بندغ ہرا کہ نم تون ہیت کننگ اٹی ءِ تینا مچ آ وجود تون اوار بے ڈَولی تیان بد بیسہ ءِ۔ نئے اونا است خواہی ءِ کہ کمرہ عدالت اٹی او تینے اسہ علامہ اس پاش کننگ نا خواہندار ءِ۔ و نئے کس انا جوزہ غاتے شیف خلنگ اٹی ءِ۔ کنے دا عدالت نا مون آ اِرا سوب جوڑ کرسا تینا رکھ ءِ تینٹ کروئی تمنگ اٹی ءِ۔ اول تو دا کہ کنے کانودی مدت و کمکی آن سرجم وڑ اٹ مُر تخنگانے۔ و ارٹمیکو دا کہ بیرہ ہمو بندغ دا وڑ انگا وارخواہی تیا ہیت کننگ کیک، ہراکہ دا وڑ بھاز زیات ٹھپّی مرے۔ ہرا کہ تینا ملک ءِ دا وڑ گوجالوک خنے، و اونا انصاف ءِ دا وڑ بے عزت و بے شرف خنانے۔ ہندا لوز آتتون تعلقدار ہیت کننگ کیک، تاکہ اونا است انا دترتے و است انا کڑمبی تیٹی ڈکوک آ راست آک اونا است آن پیش تمر۔

دن انگا سخی انگا کامریڈ آتا ہچ ءُ کمبوتی اس الو ہراکہ کنا رکھ ءِ کننگ نا است خواہی ءِ کریرہ۔ ہوانا بار ایسوسی ایشن نا اسہ جیرتی، ہمتی، لائخ ءُ کانود نا استاد اس، ڈاکٹر جارج پیگلیئری ءِ کن کن کرے، کہ او دا کیس اٹی کنا نمائندگی ءِ کے۔ ولے اودے اونا زمواری ءِ اڈ تننگ کن اِلنگتو۔ ہرا وخت آ کہ او کن تون ملنگ نا کوشست کرے تو اوڑکن جیل انا درگہ غاتے بند کننگا۔ یک ونیم تُو آن گُڈ او ہم عدالت نا نیام تمنگ آ، اودے ملٹری انٹیلی جنس ایجنسی (SIM) نا اسہ ایجنٹ اسے نا ساڑی گری ٹی کن تون 10 منٹ اکن ملنگ نا موکل تننگا۔ لس دستور تو دا ئس کہ وکیل ءِ تینا موکل تون جتائی ٹی ملنگ نا حق دوئی مریک و دا حق ءِ مُچ آ دنیا ٹی شرف تننگک۔ بیدس اسہ ہندن ءُ سخت است، زوراور اسے نا دوٹی اسہ کیوبائی بندی سے نا کیس آن، ہرا کہ اسہ کانود ءِ ہم منپک، اسُل کہ او لیگل مرے یا انسانیت نا بابت اٹ مرے…… نئے ڈاکٹر پیگلیئری و نئے ٹرائل کن تینا رکھ اکن تینا وڑ تے ٹی دا وڑ انا گندہ جاسوسی ءِ سگنگ کرینہ۔ مننگ کیک او ہمو دروغ تے بے باوری نا کچ اسکان نا جال ءِ مش انا کچ اٹ کم کننگ کن ننا وڑوڈول آتا بارو اٹ چاہنگ خواہسکہ۔ ہرا وڑ کہ او مونکیڈا نا بیرک آتا چارما کنڈ آ جوڑ کریسُس۔ نن ہرا وڑ دا خلیس آن پُر انگا راست ءِ بے پڑہ کننگ نا خڑک آ ئسنہ، او اخس وخت اسکان دادے ڈکور؟ گڑا نن فیصلہ کرین کہ اسہ وکیل اسے آنبار تینا کسبی آ حق آتا فائدہ ءِ ہرفسا تینا رکھ انا کاریم ءِ تینٹ کین۔ 

ننا دا فیصلہ نا ہیت ءِ سارجنٹ بنگ۔ و تینا بھلا واکدار آتے رپورٹ کرے۔ دا خبر اوفتیا اسہ خلیس اس تالان کرے۔ ہندن لگاکہ دا اوفتے کن اسہ چنکو مسخرہ اسے، ولے ای اوفتا کل ڈٹ ڈَول آتے بھس کننگ نا خڑک آٹٹ۔ 

شرف دار آ جج آک! نم چارے کہ کیوبائی روایت نا کنا دا حق ءِ پلنگ کن کنے آ اخہ در زور شاغنگا۔ عدالت دا وڑ انا فتنہ غاتے سگنگ کننگ کتوکہ دا سوب آن کہ دا وڑ انا دوبہ لگوک آ بندغ ءِ دن اسُل بے رکھ حالیت اٹ اِلنگے۔ دوبہ دار ہرا کہ تینٹ تینا رکھ ءِ کننگ نا حق ءِ کاریم اٹ اتنگ اٹی ءِ، اسہ وڑ اسے ٹی ہم بیدس گڑاس پاننگ آن پدی ہڑسینگپک۔ انت گڑاس کہ اودے پاروئی ءِ ای بِنا ٹی دا ہیت ءِ سفا کرینُٹ۔ اسہ خلیفوک ءُ تنیائی اسے نا سوب آن دا پاننگ المی تکوہ کہ کنے چُپ سلنگ، کسفنگ نا ڈٹ ڈَول آتا پَد آن دیر ئس، ہرافتا عدالت ءِ سما ءِ، مخلوق تون مروک آ بھلا واقعہ غاتے ڈکنگ انگ ءِ۔ و کل حیران کروک آ گڑا تیان پد و ہمو راستکیک ہرا کہ مقدمہ نا وخت آ پیش بسر۔ ای دا کل گڑاتے سرجمی اٹ اوار بیان کننگ خواوہ۔ 

نی ……کل انا مون آ دا کیس ءِ دا ریپبلک نا تاریخ اٹی کل آن خاص وڑ انگا کیس اڈ تسوسُس۔ اگہ نی سنجیدگی اٹ دا ہیت آ باور کیسہ تو نے تینا اتھارٹی ءِ رسوائی تون اوار لپی کننگ یا کم کننگ کن الوئی الو۔ اولیکو عدالتی سیشن 21 ستمبر آ ئس۔ 100 مشین گن آتتون اوار زغم ہرفوک بندغ آک، عدالت نا کمرہ غا جلہو کریر، سد آن زیات بندغ بندی تا کٹہرہ ٹی تولوک ئسرہ۔ ہرافتیٹی بھازی نا تا دا ہیت اتون تعلقداری الو۔ او چندی دے آن امتناعی وڑ اٹ دزگیر ئسرہ۔ و بیداد یونٹ آتا چیمبر آتیٹی ہر وڑ انا سختی و بے عزتی تا زموار ئسرہ۔ ولے ایلو دوبہ دار آک یعنی کم اٹنگاک، بھاز کم تا بہادر و سوگو ارادہ والو ئسرہ۔ او آزاتی نا جنگ اٹی بشخ ہلنگ کن گمر اٹی سنبرینگوک ئسرہ۔ و اوفک بے مٹ ندر مننگ کن تیار ئسرہ۔ او بندغ آتے جیل انا تہترون تیان آزات کننگ نا پکا ارادہ کریسر۔ ہرافتے رزاک آ خراب انگا نیت اٹ مقدمہ غاتیٹی زموار گوندنگاسس۔ ہموفک کہ دا جنگ اٹی اسٹ ایلو ءِ خناسُر، دوارہ اسٹ ایلو نا مون مقابل مسُّر۔ اسہ وار ولدا ننا کنڈ آن انصاف نا کاز اتون تُد، ولدا ذلت و رسوائی نا برخلاف راست انا گڑیفوک آ جنگ اس بنا کرینہ۔ یخین اٹ حکومت تین کن تخوک آ اخلاقی بربادی کن تیار الو۔

ہرا وڑ او تینا کل دروغ اٹ جوڑ کروک آ دوبہ غاتے برجا تخنگ کریکہ؟ انت گڑاس اصل اٹ مسوسُس اودے راز اٹی تخنگا؟ و او ہم ہمو وخت آ ہرا وخت آ کہ ورناک دا ہیت اکن ہر گڑا ءِ گڑتی تا باٹی تسر۔ بندی گری، ٹارچر، و گرج مس تو مرک ہم۔ تاکہ دا عدالت نا مون آ راست پاننگے۔

ہفتئی تلار
تاک: 40
17-23 Oct, 2020
پنہ: 03