براہوئی زبان نا تاریخ(15)

ننا راج انا گڑاس نزوریک:۔

دن تو ہچ ءُ قوم و راج اس کمتی و نزوری آن خالی متنے، نئے دا زمانہ ٹی ارے نئے مُستی مروءِ، دا دعویٰ ءِ اگہ کس کیک، کنا خیال ءِ کہ او دعویٰ دنیا نا راستکی تتون بریبر تموک اس اف۔

نن دا پاپنہ کہ ننا راج تو نزوری آن اسُل خورک ءِ، ولے دا پانہ کہ بلوچ راج اٹی اسلامی و بلوچ روایت آتارد اٹ بھاز آ گندہ انگا ہیت آتا چرچاءِ کننگ نا کوشست ءِ کپسہ۔ بلکن اودے ڈکِنگ نا جہد کیرہ۔ دا نزوریک علاقہ و زبان نا پاروک آتا رد اٹ جتا جتا ہم مننگ کیرہ، و دافتیان بھلو کچ اس اسہ وڑ ہم مننگ کیک، ولے بلوچ قوم انا ہرا علاقہ مرے یا اونا ہرا زبان نا پاروک آک مریر اوفتیٹی رواجی وڑ اٹ ہم و روایتی وڑ اٹ ہم نن پاننگ کینہ کہ بھاز آ نزوریک اریر، ہرافتے امنا کننگ قومی لائخی و بود ءِ ودفنگ نا سوب ہم مننگ کیک۔ و اگہ دافتے نن پڑدہ کرسا کانہ تو یخین اٹ دا نزوری تا ایسری کن کسر تے بند کینہ۔ دا نزوریک کیہی وڑ انا اریر، ایہن ہُننگے تو ننا راج اٹ سیاہ کاری و پین بھازآخراب انگا کاریم تا یاتی ءِ تینا نیاڑی، چنا و مجلس اٹی جوان تکپسہ۔ خیر خوائی کروک آتا ننا راج اٹی ہر زمانہ ٹی بھلو کچ اس مریک، ہندا سوب آن بھاز وڑ انا شر و پھسات آک گیشتری زو چٹرہ۔ اگہ کس اس راج اٹی منافقی و شیطانی کرے تو راج انا بھلو کچ اس اونا دا منافقی و شیطانی ءِ چالاکی آخا بلکن بھلو عیب اس تکک۔

بھاز آ جوانی تتون اوار اوار راج انا نزوری تیان اسہ نزوری اس دا ارے کہ ننا بھاز آک بیدس خواری آن راج اٹی بھلو پن اس کٹنگ خوارہ، سڑداری، ٹکری، میری متبری نا ننے آن بھاز آتے بھلو شوق اس ارے، داڑکن کل آن آسان کسر ننے لقب ”میر“ نظر بریک، بھازآک خوارہ کہ ننے میر پار، حالانکہ میری نا معنہ ءِ ہم پُہہ مفسہ کہ اصل اٹی میر امر انگا بندغ ءِ پارینو یا پارہ۔ میر انا بارو اٹ پنی انگا مورخ محمد سردار خان نوشتہ کرینے کہ، لوز امیر عربی لوز اسے فارسی ٹی دادے گونڈ کرسا میر کرینو۔ ہرانا رد اٹ بھلا، امیر، امیران یا ملک الامرا پاننگاکہ، خلفائے راشدہ غاک امیر المومنین پاننگارہ، خلفائے عباسیہ ہموفتا نقش قدم اٹ ہنا۔ ہمو رد اٹ داسہ ہم ہندن پاننگک۔ بلوچ راج اٹی سڑدار و ٹکری نا ہمو زنک ہرادے سڑداری یا ٹکری گری رسینگپ، اودے ”میر“ پارہ۔ یعنی یخین اٹ سڑدار نا پد اٹ بھلو زنک اس مریک، بھلو خاہوت اس مریک، ولے اوفتیان بیرہ اسٹ اسے سڑدار مروئی ءِ۔ تو گڑا ہرا کہ سڑدار مریک تو او لامحالہ سڑدار پاننگک، و دا خاہوت نا ایلو نرینہ غاک میر پاننگرہ۔

برجا ءِ

ہفتئی تلار
تاک: 40
17-23 Oct, 2020
پنہ: 02