زندان نا ڈائری(سال 1973ء)……13

ڈسٹرکٹ جیل نا اسیر آک

اسلم کُرد

محمد اسلم کرد بلوچ اسٹوڈنٹس آرگنائزیشن کوئٹہ زون انا سینئر جوائنٹ سیکرٹری ئس، زونل صدر حنیف بلوچ نا دزگیری و ایلو عہدیدار آتا است خواہی مفننگ و منٹ اسے نا فارغ التحصیل مننگ آن پد کوئٹہ ٹی آرگنائزیشن نا زمواری تے دوئی کرے۔ بی ایس او کوئٹہ زون ءِ بھاز متحرک تخا، کنا بھلا ایلم ئس۔ بلوچ قومی سیاست اٹی انگریز آتا دور آن خاہوت نا سیاست تون ہم گرنچ مننگ، و ایوبی آمریت نا دور اٹی باوہ، و اِلہ غاتا، و ایلو تینائی تا ریل و جیل انا سفر ءِ خنسا زند انا بنائی دے تیان بلوچ اسٹوڈنٹس آرگنائزیشن نا پڑ آن متحرک مس۔ ایوبی آمریت نا دے تیٹی سیاسی برانز و طلباء تحریک اٹی مون نا صف آتیٹی ئس۔ نواب اکبر خان بگٹی نا یلہ مننگ آن پد اوڑان بھاز خڑک مسوسس۔ 1970ء نا گچین کاری تا وخت آ نیشنل عوامی پارٹی نا گچین کاری ”گدان“ ءِ اسہ ہچ گاڈو سے آ تخسا کوئٹہ نا گلی کوچہ غاتیٹی نیپ انا مخ تفی نا پڑو کریکہ۔ نیپ انا گچین کاری جلسہ غاتیٹی ہم مون نا صف آتیٹی ئسکہ۔ علاقائی نیپ انا ورکر یار محمد زہری (یارجزین) حسن بلوچ شاد چپل والا اسک اوڑتون کمکاری کرسا دے و نن خواری کریرہ۔ نیپ انا سرسہبی نا ویدن ہندا فائدہ غان بے چکار ورکر آتا منتوار ئس۔ نیپ گورنمنٹ نا دے تیٹی عوامی ویل آتا ایسری کن بھاز کوشست کریرہ۔ سیاست دا ورکر آتے کن عبادت نا درجہ تخاکہ۔ پن کٹنگ آن بے چکار اوفک ہر وخت جہد اٹ اختہ ئسر۔ بلوچستان اٹی نیپ حکومت نا دے تیٹی بنجا نا کنڈ آن ودی کروک تنکی تا وخت آ ہم دافک دے و نن متحرک ئسر۔ پولیس ہڑتال نا وخت آ تھانہ و جیل آتے ہندا ورکر آک تینے آ جلّار۔ نواب اکبر خان بگٹی نا است اٹ کننگ آن پد دا ورکر آک بگٹی نا خڑکی ءِ اِلار۔ نیپ حکومت آن پد اسلم کرد ”براہوئی ورنا“ نا سالار حمید شاہوانی و براہوئی اسٹوڈنٹس فیڈریشن نا سیکرٹری جنرل محمد عمر مینگل ءِ بلوچ اسٹوڈنٹس آرگنائزیشن اٹ ایس۔ پگہ غا وزیر اعظم ذوالفقار علی بھٹو کوئٹہ نا بننگ آ بھٹو نا آمریت نا برخلاف پوسٹر و پلے کارڈ آتے ایئر پورٹ نا دیوال و کھمبہ غاتیا خلکر، دا مارچ 73ء نا بنائی دیک ئسر۔ سلیم اکبر بگٹی ءِ حوال رسینگا تو او ایئرپورٹ روڈ آ اسلم کرد و اونا سنگت آتے گھیڑ کرے و تینا جیپ اٹ تولفے درے۔ دا سنگت آتیٹی بی ایس او ٹی پوسکن بروک آ باسک حمید شاہوانی و محمد عمر مینگل اسک ہم ئسرہ۔ ولدا پگہ غا بیگہ تون بلوچ ورنا نا سالار میر قطب خان لہڑی اسہ جیپ اسے ٹی ننا اُرا غا بس و باوہ بزگوار ءِ اسلم نا برمتہ نا بابت معلومداری تس۔ میر قطب خان لہڑی اسلم نا خڑک انا سنگت آتیان ئس، ولے سیاسی بنداو آ او نواب اکبر خان بگٹی نا کنڈ آن ئس۔ بی ایس او و نیپ انا بھاز مخالف اس ئسکہ۔ داڑے او تینا متکن آ سنگتی ءِ مون آ تخسا تینا زمواری ءِ سر تس۔ کنا باوہ دا معلومداری تے سینیٹر عبدالواحد ءِ پارے۔ معلومداری رسینگ تون سینیٹر میر عبدالواحد تینا اُرا نا فون آن نواب محمد اکبر بگٹی آ فون کرے و پارے کہ اسلم کرد ءِ اگہ تینا زیرخون آن یلہ کتویس، تو پگہ غا کنا زیرخون اٹی سلیم اکبر مرو۔ میر عبدالواحد بھاز ترند و جوزہ ٹی بروک ءُ بندغ اس ئسکہ، اونا دا وڑ آن نواب اکبر خان بگٹی جوان واخب ئس۔ و اسہ بھلو وخت اس اسکان اسیجائی مسخت آتا دوئی کننگ کن کاریم کریسر۔ نواب اکبر خان بگٹی میر عبدالواحد نا فون آ ہیت و گپ ءِ بنگ و ورندی ٹی پارے کہ ”واحد! کنے سما اف، اگہ او کنا زیرخون اٹی بند ءِ تو ساہت اسے ٹی اودے اِلنہ۔“ گڑا اسہ گھنٹہ اسے آن پد اسلم کرد و اونا سنگت عبدالحمید شاہوانی و محمد عمر مینگل یلہ کننگار۔ داکان حمید شاہوانی و محمد عمر مینگل بی ایس او ٹی پین ترندی اٹ جہد انا بناءِ کریر۔ بی ایم کٹی و صدیق بلوچ ہرا کہ گورنر میر غوث بخش بزنجو نا آفس اٹی ئسرہ، میر بزنجو نا گورنری آن پد کنا باوہ اوفتے ننا ہمسائے ٹی کرائی ءُ اُرا اس ترفے۔ صدیق بلوچ نا اُراٹی ہمو دور اٹی بی ایس او نا راہشون تا مچی مسکہ۔ بی ایس او نا بنجائی سیکرٹری جنرل مجید بلوچ (ساجدی) و اونا ایلم سعید ساجدی تون اوار صدیق بلوچ نا ایلم اسلم جنگیان، گاجیان بلوچ، پی آئی اے نا غلام محمد بلوچ (بی آر بلوچ) و اسہ پین کراچی آن خوانوک ورنا اس، حسین بخش بانگو رہینگارہ۔ اسلم، حمید شاہوانی و محمد عمر و ایلو بی ایس او نا راہشون تیان بیدس صوفی عبدالخالق، علی لہڑی و اونا سنگت آتا داڑے ہن بر مسکہ۔ صدیق بلوچ نا اُرا بی ایس او کوئٹہ کن اسہ وَت اسے نا دروشم دوئی کریسس۔ نیشنل عوامی پارٹی نا راہشون تیٹی بی ایم کٹی، ملک بور جان کاسی ہم داڑے حالیت و واقعہ غاتیا شرہ کن بسرہ۔ وخت وخت اس بی ایم کٹی تون ہم دا سنگت آتا مجلس لگاکہ۔ بی ایم کٹی نا رہی آ نادر قمبرانی نا اُرا ئسکہ۔ او ہم گشتری داڑے بسکہ۔ صدیق بلوچ نا اُرا غا ہم نادر قمبرانی ہناکہ۔ بی ایس او نا بنجائی سیکرٹری جنرل مجید بلوچ نا صدیق بلوچ نا ہنکین اٹ رہینگ نا سوب آن گیشتری تنظیمی پروگرام آک ہم داڑے جوڑ مسرہ۔ و ورکر آتے زمواریک تننگارہ۔

ہفتئی تلار
تاک: 40
17-23 Oct, 2020
پنہ: 02