بلوچستان، شکست آتے توننگ کن بس آتیٹی ٹریکر خلنگ آ سجفنگ نا بنا

کوئٹہ(خ ن/ اے پی پی) وزیراعلیٰ بلوچستان جام کمال خان نا کماشی ٹی اڈ ہلوک دیوان اٹ کوئٹہ کراچی قومی شاہراہ آ چلینگوک آ کوچ آتیٹی ٹریکنگ سسٹم نا خلنگ و حکومت بلوچستان نا گرین بس ڈٹ انا جاچ ءِ ہلسا دا بابت اٹ اہم ءُ فیصلہ کرے۔ ایڈیشنل چیف سیکرٹری داخلہ حافظ عبدالباسط، سیکرٹری ٹرانسپورٹ بشیر احمد بنگلزئی، سیکرٹری حوالکاری شاہ عرفان غرشین وکمشنر قلات ڈویژن وڈیو نا کمک اٹ لنک دیوان اٹ بشخ ہلک، دیوان اٹ سیکرٹری ٹرانسپورٹ بشیر احمد بنگلزئی بریفنگ ترسا پارے کہ قومی شاہراہ آ چلینگوک آ کوچ آتیٹی ٹریکر ڈیوائس نا خلنگ آن اوور سپیڈنگ ءِ کنٹرول کننگک و ہمو کوچہ غاتا ڈیٹا ہم دوئی مریک وخت اس کہ دا بابت اٹ ٹرانسپورٹر آتون اسہ میٹنگ ہم کننگک، دیوان اٹ فیصلہ کننگا کہ اوور سپیڈنگ توننگ کن صوبہ نا قومی شاہراہ تیا موٹر وے پولیس نا تعیناتی کن چیئرمین این ایچ اے و بنجائی سیکرٹری مواصلات ءِ چٹھی اس راہی کننگک۔