نواز شریف سرنڈر کننگ نا پرمان ءِ پدی ہلنگ نا درخواست ءِ دائر کرے

اسلام آباد (آن لائن) مسکوہی وزیراعظم نواز شریف العزیریہ ریفرنس اٹ عدالت نا کنڈآن جاری کروک آ پرمان آ نظرثانی نا درخواست ءِ دائر کرے۔ درخواست اٹ موقف ءِ دوئی کرے کہ کنا دا وخت آ پاکستان آ بننگ ممکن اف، عدالت کنا سرنڈر کننگ نا پرمان ءِ پدی الے۔ درخواست اٹ مستی پاینے کہ بیان حلفی ٹی طے مسوسُس کہ حکومت مالو تینا وڑ اٹ کنا جانجوڑی نا معلومداری ءِ کیک، بنجائی حکومت دانا بابت ہچ ءُ کوشست اس کتو۔ بنجائی حکومت تون کنا جانجوڑی نا بابت ہچ ءُ جوان ءُ معلومدار اس اف۔ ڈاکٹرک داسکان کن دن ءُ ہچ ءُ سرٹیفکیٹ اس تتنو کہ پدی بننگ کن فٹ اُٹ۔ نواز شریف درخواست تون میڈیکل رپورٹس آتے ہم خلک۔ درخواست اٹ مستی پاننگانے کہ جانجوڑ مننگ آن پد اولیکو فرصت اٹ پاکستان آ بریوہ، مچ آ زند زند آئین و کانود نا حکمرانی نا جنگ ءِ کرینٹ، پدی بننگ تون کل سٹی آ کیس آتون مون ایتوہ۔ درخواست اٹ پارینے کہ نمائندہ غاتا کمک اٹ اپیل آتا سماعت آ پیشی نا درخواست ءِ منظور کننگے۔ یات سلے کہ عدالت یکم ستمبر آ العزیزیہ و ایون فیلڈ ریفرنس اٹ نواز شریف ضمانت کیس اٹ اودے عدالت نا مون آ سرنڈر کننگ نا پرمان تسوسُس۔