پوریا گرک گوادر اٹ زرکاری نا وارخواہی تیان فائدہ ہرفر‘صادق سنجرانی

اسلام آباد (آن لائن) سینیٹ نا چیئرمین صادق سنجرانی پارینے کہ گوادر پاکستان نا اسہ پُوسکن ءُ بندرگاہ اسے نا وڑاٹ مون آ بننگ اٹی ءِ او زوت اس گوادر صنعتی و سرمایہ کارانہ سرگرمی تا بنجا مریک وخت اس کہ کاروباری برادری گوادر اٹ کاروبار نا مون آ بروک آ وارخواہی تیان جوان فائدہ ہرفنگ نا کوشست کے۔ دا خیال آتا درشانی ءِ او اسلام آباد چیمبر آف کامرس اینڈ انڈسٹری نا اسہ ڈل اسے آن تران کرسا کرے ہرا صدر محمد احمد وحید نا کماشی ٹی اوڑتون اوڑدہی کرے۔ قومی اسمبلی نا باسک و پی ایف سی سی آئی نا مسکوہی نائب صدر گودی ساجدہ ذوالفقار ہم او وخت آ ساڑی ئس۔ چیمبر نا نائب صدر سیف الرحمن خان و مسکوہی سینئر نائب صدر و یو بی جی ایف پی سی سی آئی نا چیف کوآرڈینٹرملک سہیل حسین ڈل اٹ اوار ئس۔ صادق سنجرانی پارینے کہ گوادر داسہ کاروبار و سرمایہ کار آتیکن جوان مننگ اٹی ءِ وخت اس کہ کاروباری برادری ءِ بایدے گوادر تون اوار بلوچستان اٹ سرمایہ کاری آ خاص سجفے۔