مچ آ قوم ءِ فوج آ گمر ءِ، اسپیکر و ڈپٹی سپیکر قومی اسمبلی نا پاک فوج نا ستا

اسلام آباد(آن لائن) اسپیکر قومی اسمبلی اسد قیصر و ڈپٹی اسپیکر یوم دفاع نا وخت آ پاک افواج ءِ خراج تحسین پیش کرسا پارینے کہ ملکی سیم نا رکھ و ملک اٹ دہشتگردی نا برخلاف جنگ اٹ پاک فوج ہراوڑ جرات مندی و بہادری نا درشانی ءِ کرے دانا مٹ رسینگپک۔ او پارینے کہ مچ آ قوم ءِ تینا سلہہ بند فوج آ گمر ءِ۔ تینا بیان اٹ اسپیکر اسد قیصر پارینے کہ اینو نا دے ننے 1965 نا ہمو شہید آتا یات ءِ اُست آ اتیک ہرافک ہمت و شجاعت نا درشانی ءِ کرسا تینا جان تے ندر کریر و دشمن نا سجفوک آ ارادہ غاتے مِش تا گواچی کریر۔ اوفک پارینو کہ ننا سلہہ بند فوج تینا پیشہ ورانہ لائخی تا سوب آن دنیا ٹی اسہ جتا ءُ ہند اس تخک۔ او پارینے کہ ننا فوج دہشتگردی نا برخلاف جنگ اٹ ہرا سرسہبی تے دوئی کرینے دانا مچ آ دنیا ستا ءِ کیک۔ اسپیکر اسد قیصر پارینے کہ ملک انا رکھ سوگو انگا دوتیٹی ءِ او پاک فوج نا ساڑی گری ٹی دشمن پاکستان نا کنڈ آ خراب انگا نظر اٹ ہننگ نا جرات ہم کننگ کپک۔ او پارینے کہ ملک آ ہراتم ہم سخت ءُ وخت اس بسنے تو مچ آ قوم جوان وڑاٹ پاک فوج تون اوار مسنے۔