دفاع پاکستان آ ندر مروک آ فوجی ورناتا یات مدام زندہ سلک، بلاول بھٹو

اسلام آباد/کراچی (آن لائن) پاکستان پیپلز پارٹی نا چیئرمین بلاول بھٹو زرداری ملکی سیم تا رکھ و ملک انا طول و عرض اٹ دہشت گردی نا برخلاف جنگ اٹی تینا جان تے ندر کرسا بہادر فوجی ورنا و عام شاری تے جوان انگا لوز آتیٹی خراج عقیدت پیش کرینے۔ یومِ دفاعِ پاکستان نا وخت آ جاری کروک آ تینا کلہو اٹ پی پی پی چیئرمین پارینے کہ تینا فرض آتا ادائیگی نا وخت آ جامِ شہادت نوش کروک و انتہاپسندی و دہشت گردی نا ٹارگٹ مرسا جان تے ندر کروک آک قوم انا ہیروک ءُ، ہرا ننا بروک آ نسل انا یات آتے ہر وخت زندہ تخرہ۔ بلاول بھٹو زرداری پارینے کہ پاکستان نا اولیکو جمہوری وڑ اٹ گچین مروک آ وزیر اعظم شہید ذوالفقار علی بھٹو ننا  جوہری پروگرام نا بنداو ءِ تخا، ہرا اینو پاکستان نا دشمن کن حوصلہ شکن فصیل اسے۔ وزیراعظم شہید گودی بینظیر بھٹو بیلسٹک میزائل ٹیکنالوجی ترسا ملک انا دفاعی گرج آتا بابت تینا باوہ نا ویژن ءِ پورو کرے۔ او پارے کہ جمہوری حکومت آتیٹی ہر وخت پاکستان نا رکھ ءِ مالو آن زیات سوگو کننگا۔ او مستی پارینے کہ اسہ متحرک و سوگو ءُ جمہوریت اسے تون لائخ،  بھاز متحد و نظم و ضبط انا رکھوک و سیکیورٹی ادارہ غاک  ناقابلِ تسخیر دفاع نا ضامن ءُ۔ بلاول بھٹو زرداری پارینے کہ بنجائی سیاسی قوت آک  نظریہ پاکستان نا علمبردار ءُ و اوفتے سٹی نسخان تننگ یا نزور کننگ کن کروک آ کوشست آک پاکستان نا سالمیت ءِ نسخان رسیفنگ آن بیدس ہچ اس افس۔ او دا عزم انا اعادہ ءِ کرے کہ پاکستان پیپلز پارٹی نا کماش و کارندہ غاک تینے ہمو شہید کماش آتا وژن نا رداٹ پاکستان نا سوگو دفاع کن جوان کاریم کروئی تمک، ہرافک تینا جان تے ندر تو کریر ولے ملک انا دفاع، سلامتی و جمہوریت آ سمجھوتہ کتوس۔