6 ستمبریوم دفاع پاکستان قومی جیرت و بہاری نا دے ءِ، صادق سنجرانی

اسلام آباد (آن لائن)چیئرمین سینیٹ صادق سنجرانی یوم دفاع نا وخت آ تینا کلہو اٹ پارینے کہ 6 ستمبریوم دفاع پاکستان اٹ قومی جیرت و بہادری نا دے ءِ۔ دشمن ملک انا فوج آک 6 ستمبر آ جہانی کانود آتا خلاف ورزی ءِ کرسا نن نیمہ غا مملکت پاکستان آ جلہو کریسُس۔ پاکستان نا فوج و بہادر اُلس ملک انا رکھ و سلامتی و آجوئی کن تینا جان تا پرواہ ءِ کپننگ آن بیدس بھارتی فوج انا مون آ جیرت و بہادری نا ہمو مثال ءِ قائم کریر ہرادے ہر وخت یات تخنگک۔ دشمن ملک نا کل ناپاک آ سوچ آتے مِش تا گواچی کریر۔ افواج پاکستان نا حساب دنیا نا بہادر،جرات مند و سوگو انگا فوج آتیٹی مریک ہرا نہ بیرہ تینا ملک وخت اس کہ اقوام عالم نا امن مشن و انسانیت نا بھلائی و رکھ اکن کیہی وار تینا لائخی تے نشان تسنو۔ او پارینے کہ ننے کل ءِ تینا فوج آ گمر ءِ ہرا دہشت گردی نا لعنت ءِ نیست و نابود کرے و ضرب عضب و ردالفساد آمبار انگا آپریشن ءِ بنا کرسا دہشت گرد آتا مخ ءِ پرغا، ملک انا امن و سلامتی کن ورنا تینا زندگی ءِ ندر کریر ہرادے مچ آ قوم قدر انا نگاہ ٹی ہرک۔ اینو نا دے تینا شہید آتے جوان خراج عقیدت پیش کننگ نا دے ءِ۔ او پارینے کہ یوم دفاع پاکستان نا اڈ تننگ اصل اٹ دشمن قوت آتیکن دا کلہو ءِ تننگ نا ءِ کہ افواج پاکستان و اُلس 1965 و 1971 نا جنگ و ملک اٹ دہشت گردی نا برخلاف ہرا عزم و جیرت نا درشانی ءِ کریر مستی ہم تینا مادرِوطن نا رکھ اکن ہر وڑ نا قربانی کن تیار ءُ۔ ننے کل ءِ ملسا قومی ویل آتا مقابلہ بانی پاکستان محمد علی جناح نا راہشون آ اصول ایمان، اتحاد و تنظیم آن کاریم ہلسا اڈ ایتنہ۔ ننے اواری ٹی خواری ٹی ملک انا شونداری و شونہالی ٹی تینا تینا کڑد ادا کروئی ءِ۔