25نومبر آ پاکستان نا اولیکو خلائی مشن رادہ مریک، 2035 لینڈنگ ہدف پک، احسن اقبال

بنجائی وزیرِ ڈٹ بندی احسن اقبال نا وژن نا رد اٹ سپارکو نا کمک اٹ نارووال اٹی اولیکو جہانی ورلڈ اسپیس ویک 2026ء اڈ تننگا‘ ہرانا مسخت ورنا چین اٹی خلائی علم، سائنسی پٹ وپول وپوسکنوڑ ٹیکنالوجی تون تعلقدار حکمت عملی تالان کننگ ءِ۔ نارووال اٹی ورلڈ اسپیس ویک اناگڈیکو دود آن تران کرسا احسن اقبال پارے کہ 25 نومبر آ پاکستان نا اولیکو خلا باز چین نا خلائی ہند آن خلائی مشن آ راہی مریک وخت اس کہ پاکستان 2035ء اسکان توبے آ لینڈنگ نا ہدف پک کرینے۔ چین نا کمکاری اٹ پاکستان خلائی پٹ وپول انا پڑ اٹی پوسکن آ بڑزی تیا سر مریک‘ بنجائی وزیر پارے کہ خلائی ٹیکنالوجی کشت وکشار‘مواصلات، موسمیاتی بدلی، تعلیم و قومی سلامتی تون اوار زند انا جتا بشخ آتیٹی بنداوی کڑد ادا کننگ اٹی ءِ۔ او پارے کہ خلائی پٹ وپول آخبت نا شونداری، سائنسی دریافت و انسانی علم انا شون تننگ کن المی ءِ۔ احسن اقبال پارے کہ قرآنِ مجید انسان ءِ کائنات نا تفنگ آ سجفنگ نا سلہ خلیک‘ ہندا سوب آن ورنا تیٹی سائنسی تجسس، پٹ وپول و علم انا دوئی کننگ نا جوزہ ودی کننگ وخت انا اہم ءُ گرج اسے۔ او پارے کہ مسلمان سائنسدان مستین اٹی فلکیات و سائنسی پٹ وپول اٹ نمان ئسر‘ و پاکستان ءِ علم و پٹ وپول نا پڑ اٹی تینا کماشی ءِ دوارہ دوئی کننگ کن مونی ہنوئی تمک۔ بنجائی وزیر اسلام آباد سائنس فیسٹیول اٹی یونیورسٹی آف نارووال نا اولیکو پوزیشن ءِ ورنا تا لائخی تا شاہدی گوندسا پارے کہ پاکستان نا ورناک علم و پٹ وپول نا کمک اٹ پوسکن آ بڑزی تیاسر مننگ اٹی ءُ۔ او پارے کہ مستین اٹی مالی مشکل آتا سوب آن بڑزکو تعلیم آن محروم مروک طالب علم آک اینو مچ آ ملک اٹ نمان سرسہبی دوئی کننگ اٹی ءُ۔ احسن اقبال پڑو کرے کہ ورنا تیٹی خلائی علم اتون استخواہی ودفنگ و سائنسی سُج پام تالان کننگ کن یونیورسٹی آف نارووال اٹی پاکستان نا اولیکو اسپیس میوزیم جوڑ کننگک۔