شعیب ملک ءِ وختی آن پارینٹ کہ بھارت تون ہر وخت مخلص مریوہ‘ثانیہ مرزا

حیدر آباد دکن (مانیٹرنگ ڈیسک) پاکستانی کرکٹر شعیب ملک او بھارتی ٹینس اسٹار ثانیہ مرزا نا برام 2010ء اٹ مسوسُس، ولے دا جوڑی داسکان کن میڈیا نا زینت جوڑ ءِ۔ منہ دے مُست ثانیہ مرزا تینا انٹرویو سے ٹی پاریسُس کہ اونا شعیب ملک تون اوڑدہی پاکستان او بھارت نا نیام اٹ مروک آ میچ آتے ٹی بنا مسوسُس۔ او پارینے کہ ای شعیب ملک ءِ وختی پاریٹ کہ او ہر وخت بھارت تون مخلص مریک ہراڑا شعیب ملک پاریکہ کہ اونا بھارت نا برخلاف ریکارڈ بھاز گچین ءِ، وخت اس کہ اودے بھارت نا برخلاف گوازی کننگ اٹ مزہ بریک۔ ثانیہ مرزا ءِ مہندرا سنگھ دھونی او شعیب ملک نا نیام اٹ گڑاس گڑا اسہ وڑ نظر بریرہ۔ ثانیہ مرزا پارینے کہ کیہی گڑاک ہڑتوم آتے ٹی اسہ وڑ ءُ، ہڑتوم آک کرکٹ فیلڈ اٹ بھاز آرام اٹ مریرہ۔ ثانیہ پارینے کہ دھونی ءِ چُپی ٹی ریٹائرمنٹ نا پڑو ءِ کننگ نا جاگہ غا جوش و جوزہ ٹی گوازی ءِ الوداع کروئی ئس، او اسہ بھلو اسٹار اسے او بھاز زیات سرسہبی دوئی کرینے۔