آئین نا آرٹیکل 232 نا توثیق، سینٹ، قومی اسمبلی: خیبر پختونخوا ٹی گورنر راج انا نفاذ نا بابت قرارداد امنائی وڑ اٹ منظور

اسلام آباد، سینٹ و قومی اسمبلی آئین نا آرٹیکل 232 نا توثیق ءِ کرینو، خیبرپختونخوا ٹی گورنر راج نا نفاذ نا بابت قرارداد امنائی وڑ اٹ منظور کننگا، قرارداد نا منظوری نا وخت آ اپوزیشن برانز کرسا واک آؤٹ کرے۔ چارشنبے نا دے سینٹ نا دیوان چیئرمین سید یوسف رضا گیلانی نا کماشی ٹی بنا مس۔ دیوان اٹی بنجائی وزیر پارلیمانی باندات ڈاکٹر طارق فضل چوہدری آئین نا آرٹیکل 232 نا شق نمبر 1 نا رد اٹ خیبرپختونخوا ٹی صدرِ مملکت نا کنڈ آن جاری کروک ایمرجنسی نافذ کننگ نا دستاویز ءِ ایوان اٹی پیش کرے۔ دا وخت آ بنجائی وزیرِ کانود سینیٹر اعظم نذیر تارڑ پارے کہ دا اسہ آئینی زمواری اسےِ ہرادے پورو کننگ کن ایوان اٹ پیش کرینن۔ او پارے کہ ہرا قرارداد پیش کننگانے دا آئین نا رد اٹ المی ءِ و ہرا قرارداد پرائیویٹ باسک آتا کنڈ آن اتنگانے او پیش کننگ مفک۔ دا وخت آ سینیٹر ڈاکٹر ہمایون مہمند قرارداد آ ہیت کرسا پارے کہ وزیر داخلہ ایوان اٹی اسہ کسہ اس بیان کریسس ہرا کہ رد ئس و او ایوان اٹی غلط بیانی کرے۔ او پارے کہ بیرسٹر گوہر علی خان آن عمران خان سوج کرے کہ نے تون فون ارے تو او پارے کہ آخا ہراڑا عمران خان پارے کہ جوان تو ولدا پگہ ریکارڈنگ کرفنہ۔ او پارے کہ دا حکومت آ کس ءِ ہم پت اف۔ او پارے کہ عمران خان نا بلڈ پریشر کن پیشن ملک آن ڈاکٹر ءِ بٹنگا، مگہ دا ملک اٹ بلڈ پریشر نا درمان نا ڈاکٹر اس ہم اف؟ وزیر دفاع خواجہ آصف خیبرپختونخوا ٹی ایمرجنسی نا نفاذ نا دفاع ءِ کرسا پارے کہ حکومت تون ایمرجنسی آن بیدس ہچ ءُ کسر اس بچتویسس، دہشت گردی نا برخلاف جنگ برجا سلک و سیاسی سرکڑدہ غاتے بایدے مستین نا واقعہ غاک یات مریر۔ قومی اسمبلی ٹی اپوزیشن نا تران نا ورندی ٹی او بانی پی ٹی آئی نا مسکوہی سیاسی موقف، جنرل قمر جاوید باجوہ و جنرل فیض حمید تون تعلقدار اوڑدہی و دہشت گرد آتا پدی بننگ نا باندات نا یات ءِ ترسا پارے کہ مستین ءِ انتئے گیرام کننگک؟ خواجہ آصف پارے کہ اپوزیشن نا تران تیٹی کیہی باندات آک چست کننگار، ولے مستین نا راستکی تے ہم مون آ تخوئی تمک۔ او دعویٰ کرے کہ اسہ موقع اسے آ جنرل فیض حمید و جنرل باجوہ تون مروک آ اوڑدہی اٹی اوفتے امنا کرفنگ نا کوشست کننگاسس کہ دہشت گرد آتے پدی اتنگ پاکستان کن جوان مریک۔ وزیر دفاع بانی پی ٹی آئی نا جنرل باجوہ تون تعلقدار مسکوہی بیان تا حوالہ ءِ ترسا پارے کہ منہ بندغ آک تینا باوہ نا ہم داخس ستاءِ کپرور اخس کہ بانی پی ٹی آئی جنرل باجوہ نا ستاءِ کریر۔ او اپوزیشن ءِ پارے کہ سیاسی باندات آیت ٹی مستین نا ہیت و واقعہ غاتے بایدے گوجالنگپ۔ خواجہ آصف تینا بندی گری نا دور انا یات ءِ ترسا پارے کہ اودے جیل اٹی اسہ کمبل اس تننگا وخت اس کہ شہباز شریف کس انا کمک اٹ اودے کن پین اسہ کمبل اس راہی کریسس۔ او پارے کہ او جیل انا کنشت کنگکہ و ہموڑے اودے جوان کنشت ہم رسینگاکہ ولے اسہ وخت اس اودے گیزر اینک کننگ نا پرمان ہم کننگا۔ او بانی پی ٹی آئی نا کنڈ آن جیل اٹی چیا سیڈز و ٹوتھ پیسٹ تون اوار آسراتی تا باندات آ ملنڈی وڑ اٹ ردعمل تس و پارے کہ سیاسی راہشون تے تینا مستین نا حالیت و واقعہ غاتے ہم یات تخوئی مریک۔