بلوچستان اٹی گورننس و السی خذمت نا گچینی کن کل محکمہ غاتے اول سر ٹہیفنگک،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ صوبہ ٹی گورننس نا نظام ءِ جوان جوڑ کننگ، سرکاری وسیلہ غتا گچین کاریم اٹ اتنگ و الس ءِ آب اٹو خذمت آتا فراوانی ءِ پک کننگ کن کل سرکاری محکمہ تا اولسر ٹہیفنگ و اصلاحات المی ءِ‘ حکومت سرکاری خڑچ آتیٹی بے گرج ودکی ءِ توننگ و انتظامی پنجر ءِ السی گرج آتتون ہم گرنچ کننگ کن گام گیج کیک۔ دا خیال آتا درشانی ءِ او چارشنبے نا دے سیکرٹریز کمیٹی نا جاچ دیوان اٹی تینا خیال آتا درشانی ءِ کرسا کرے۔ دیوان اٹی کیہی محکمہ تا کارکڑد رپورٹ پیش کننگا، وخت اس کہ سرکاری محکمہ غاتا انتظامی پنجر، ہیومن ریسورس‘ غیر شونداری خڑچ و السی خذمت آتا فراوانی نا جاچ ءِ ہلنگا۔ وزیراعلیٰ بلوچستان جتاجتا محکمہ غاتیٹی بے گرج بھرتی و غیر شونداری خڑچ آتیٹی ودکی آ گڑتی نا درشانی ءِ کرسا پارے کہ الس نا ٹیکس آن دوئی مروک وسیلہ غاتا اسہ اسہ پاہی قومی امانت ءِ و دا وسیلہ غاتا زیان ہچ وڑ اٹ سگنگ مفک۔ دا وسیلہ غاک ہمو لس غریب بلوچستانی نا امانت ءُ ہرا یخ اٹی لڑزک و باسنی ٹی ہشنگک۔ سرکاری محکمہ غاتا خڑچ آتا بنداوی مسخت الس ءِ گچین آسراتی تا فراوانی ءِ۔ او پارے کہ صوبہ نا دوئی وسیلہ غاتا بھلو بشخ اس غیر شونداری خڑچ آتا گواچی مننگ اٹی ءِ، اوکان پد ہم الس ءِ درکار آب انا خذمت فراوان کننگپک۔ سرکاری محکمہ غاتے بھرتی تا فیکٹری جوڑ کننگ نا جاگہ غا تینا زمواری تے گچین وڑ اٹ سر تروک ادارہ غاتیٹی بدل کروئی تمک۔ حکومت نا زمواری جتاجتا بشخ آتیٹی و مارکیٹ نا گرج آتا رِد اٹ خواست نا رِد اٹ روزگار نا وارخواہی ودی کننگ ءِ، نہ کہ سرکاری محکمہ غاتیٹی بے گرج و بے کچ بھرتی تا کمک اٹ مالی باریم اٹی ودکی کننگ ءِ۔ میر سرفراز بگٹی پارے کہ غیر شونداری خڑچ آتا ودوک آ باریم نا کیرغ آن مروک محکمہ غاک السی خذمت آتا فراوانی آ درکار چکار تننگ کپننگ ءُ ہرا گڑتی نا سوب ءِ‘ او پیدوار کرے کہ سرکاری محکمہ غاتا کارکڑد ءِ گچین جوڑ کننگ کن انتظامی اصلاحات، وسیلہ غاتا گچین بشخ و پانٹ و پرسجو نا نظام ءِ سوگو کروئی تمک۔ وزیراعلیٰ گورننس نا ویل آتیا ہیت کرسا پارے کہ صوبہ ٹی انتظامی نزوری و خراب حکمرانی نا وڑانا زمواری ءِ ایلوفتیا شاغنگ نا جاگہ غا تینا ڈیوالئی تا جاچ ءِ ہلوئی تمک۔ او پارے کہ انتظامی نظام نا بھسکاری ءِ لاہور آن بروک اسہ پنجابی اس کتنے بلکہ تینافتا سوب آن ءِ۔ پین کس آدوبہ خلنگ نا جاگہ غا ننے تینا نظام آ و تینا زمواری تیا چکار کروئی تمک۔ بلوچستان اٹی گورننس نا گچینی کن تینا نزوری تا نشاندہی و اوفتا چٹفنگ کن سنجیدہ گام گیج المی ءِ‘ او پارے کہ بلوچستان نا گچینی و الس ءِ گچین آسراتی تا فراوانی کن سخت ولے درست فیصلہ کروئی تمک۔