بلوچستان نا چندی ضلع غاتیٹی ہورہ گروک اٹ پر، ڈور و جلک دیر ایسر

بلوچستان /کوئٹہ(آن لائن)بلوچستان نا چندی ضلع غاتیٹی ہورہ گروک اٹ پِر، ڈور و جلک دیرایسر، ڈور تا دیر اتنگ آن ہرنائی کوئٹہ شاہراہ او پنجاب شاہراہ،کوئٹہ سبی شاہراہ مچھ اٹی ٹریفک کن بند مس، سد آ گاڈی والاک مَش تیٹی خوار، گاڈی تے ٹی سوار انگا مسافرک خاص کر چنا نیاڑی، پیر انگا بندغ او ناجوڑ آتے کیہی سختی دوئی مسر، بولان اٹ برجا انگا پِر آن پد بولان اٹ نوکاپ نا سوب آن ڈپٹی کمشنر ضلع کچھی مراد خان کاسی اُلس ءِ بولان قومی شاہراہ غا بے گرج سفر کپننگ نا خواست کرے۔ محکمہ موسمیات کوئٹہ، سبی، لسبیلہ،خضدار، ہرنائی، زیارت، قلات، ژوب، کوہلو، بارکھان، آواران،تربت او گردونواح میں آ ندھی اورگرج چمک کے ساتھ مزید بارشیں، قلات، خضدار، لسبیلہ او آواران اٹ ہورہ گروک او ترند پِر نا سوب آن خضدار، قلات اونا مَشی آ علاقہ غاتا ڈور و جلک تا دیر اتنگ نا خلیس ارے۔ حوال نا رداٹ بلوچستان نا علاقہ  مچھ پل انا اسہ بشخ اسے دیر دننگ نا سوب آن مچھ انا مچ آ ملک آن ڈغاری کسر بند مس۔ وخت اس کہ  بولان اٹ انتظامیہ نا کنڈآن الرٹ جاری کننگانے۔ بولان نا علاقہ  مچھ پل تدوک آ شش تُو آن نزورئس ولے مروک آ پِر و جل تا دیر اتنگ اودے پین نزور کرے۔ ہراڑان پُل انا بنا نا بشخ توس۔ داکان مُست ہراتم مچھ پل نا اسہ بشخ اس تماسُس تو اونا جوڑ کننگ اٹ مسہ سال لگاسُر، محکمہ نا غیر زمواری آن اُلس نا سختی تے تیٹی پین ودکی مس۔ مروک آ پِر تا سوب آن  کمشنر نصیر آباد عابد سلیم نا کنڈآن پِر نا بابت الرٹ ہم جاری کننگانے۔ کمشنر نصیر آباد پارینے کہ بولان اٹ برجا انگا پِر تیان پد بولان اٹ بھلو نوکاپ اس بسنے۔ انتظامیہ ہروڑ نا حالیت آتون مون تننگ کن تیار ءِ، کل ادارہ غاک  الرٹ ءُ، کمشنر نا کنڈآن اُلس آن بولان قومی شاہراہ غا بے گرج سفر کپننگ نا خواست کننگانے۔ بولان اٹ برجا انگا پِر تیان پد بولان اٹ نوکاپ نا سوب آن ڈپٹی کمشنر ضلع کچھی مراد خان کاسی اُلس ءِ بولان قومی شاہراہ نا سفر آ بے گرج سفر کپننگ نا خواست کرسا پارینے کہ بولان اٹ بھلو نوکاپ اسے نا بننگ نا گمان ارے اُلس پام کے۔ ہرنائی، شاہرگ و اونا ایب کیب اٹ ہورہ گروک تون اوار پِر و نوکاپ ہرنائی کوئٹہ شاہراہ او پنجاب شاہراہ غا ٹریفک ءِ عارضی وڑ اٹ بند کننگانے، پِر نا سوب آن مَشی آ علاقہ غاتے ٹی سد آتا کچ اٹ گاڈی اختہ مسنو۔ گاڈی تے ٹی سوار انگا مسافرک خاص کر چنا نیاڑی، پِیرانگا بندغ او ناجوڑ آتے کیہی ویل آتون مون تروئی تما۔