ایف اے ٹی ایف نا پن آ عمران خان ءِ ہٹلر جوڑ مننگ کن الیپنہ، احسن اقبال

اسلام آباد (آن لائن)مسلم لیگ(ن) نا سیکرٹری جنرل احسن اقبال پارینے کہ فنانشل ایکشن ٹاسک فورس (ایف اے ٹی ایف) نا پن آ عمران خان ءِ پاکستان نا ہٹلر جوڑ مننگ کن الیپنہ، سال اس مس ولے نیب کنا برخلاف ریفرنس دائر کننگ کتنے، کنے دزگیر کرسا جیل اٹ بند تو کننگانے۔ احتساب عدالت اسلام آباد نا مون آ میڈیا تون ہیت وگپ کرسا مسلم لیگ ن نا راہشون احسن اقبال پارینے کہ اینو ضمانت آن پہد کنا ہفتمیکو پیشی ئس، بہانہ کرسا نیب ہر وار پُوسکن ءُ تاریخ اس ہلیک، وخت اس کہ سپریم کورٹ اٹ نیب انا مؤقف ءِ کہ احتساب عدالت آک  فیصلہ کپسہ ہندا سوب آن اُرے مرسا ءِ، ولے نیب ءِ دروغ جوڑ کننگ کن وخت درکار مریک ہندا سوب آن ہر وار دا پُوسکن ءُ تاریخ اس ہلیک، ن لیگ نا راہشون پارینے کہ پاکستان نا ورنا تے جہانی آب انا آسراتی تننگ کن دا دوبہ ءِ وار وار کیوہ، مگہ شراب نا پرمٹ تننگ سہی ءِ ولے گوازی تا انفرااسٹرکچر جوڑ کننگ کرپشن ءِ؟ احسن اقبال پارینے کہ وزیر مواصلات پاہے کہ یک ءُ نیم سال مُست جوڑ کروک آ جے آئی ٹی ہرانگ ہنا، دا جے آئی ٹی نا جے ہم مون آ اتنگتو، حکومت نا بیرہ اسہ ایجنڈا اسے کہ مخالف آتا کڑد کشی ءِ کبو، اپوزیشن عمران خان آن ہچ ءُ این آر او اس خواہنگ اٹی افس، جہانگیر ترین ءِ نن نا تہارمئی ٹی نرفنگا، تو نی این آر او تسوسُس۔ او پاریسُس  کہ وزیر جانجوڑی ءِ دارو اسکینڈل آن اینگ کننگا ولے پارٹی نا عہدہ تس تو نی این آر او تسوس۔ عمران نیازی بورہ شوگر مافیا ءِ این آر او تس۔ درو سینیٹ آن رد مروک آ بل آتا بابت اٹ ہیت کرسا احسن اقبال پاریسُس کہ ایف اے ٹی ایف نا پن آ پاکستان ءِ فاشسٹ ریاست اس جوڑ مننگ کن الیپنہ۔