وزیراعظم نا اوغان قومی مفاہمتی کونسل نا سروک ڈاکٹر عبداللہ غا ٹیلفون

 اسلام آباد (آن لائن) وزیراعظم عمران خان اقغان قومی مفاہمتی کونسل نا سروک ڈاکٹر عبداللہ عبداللہ تون ٹیلی فون آ ہیت وگپ کرینے۔ ہراٹی پاک اوغان تعلقداری نا جوانی، اوغان مفاہمتی عمل تون اوار ایلو اہم انگا ویل آتیا ہم ہیت و گپ کننگا۔ ٹیلی فون آ ہیت وگپ اٹی وزیراعظم عمران خان پاک اوغان ارا کنڈی تعلقداری نا اہمیت آ زور شاغانے ہراکہ مذہب، دود ربیدہ، اوار انگا تاریخ او ہڑتوم آ ملک آتا اُلس نا نیام اٹ سوگو انگا سیالی تتون گنڈوک ءِ۔ وزیراعظم ہندا برادرانہ تعلقداری ءِ پین سوگو او کل بشخ آتے ٹی کمک ءِ جوان کننگ کن پاکستان نا اُست خواہی نا ستا ءِ کرے۔ وزیراعظم تینا سلاہ ءِ ولدا بیرہ تس کہ اوغانستان اٹ جھیڑہ نا ہچ ءُ فوجی ایسری اس اف او دا مذاکرات نا کمک اٹ سیاسی ایسری مونی ہننگ نا اسٹ انگا کسر ءِ۔ اوغانستان امن عمل اٹ پاکستان نا جوان انگا کڑد ءِ مون آ اتسا وزیراعظم دا ہیت آ زور شاغسا پارے کہ اوغان راہشون تے امن، سلامتی او اوغانستان اٹ شونہالی کن جوان ءُ سیاسی ایسری اسے نا دوئی کننگ کن دا تاریخی وارخواہی آن فائدہ ہرفوئی تمک پاکستان زوت اس انٹرا اوغان مذاکرات نا اڈ تننگ کن ہروک ءِ۔ وزیراعظم اوغان قومی مفاہمتی کونسل نا چیرمین نا وڑاٹ ڈاکٹر عبداللہ عبداللہ کن اُست خواہی نا درشانی کرے او اومیت نا درشانی ءِ کرسا پارے کہ جرگہ تینا مسخت آتے سرسہبی اٹ دوئی کیک، وزیراعظم ڈاکٹر عبداللہ عبداللہ ءِ زوت اس دورہ پاکستان نا دعوت تس تانکہ اوغان امن عمل اٹ جوانی برے او ہڑتوم آ ملک آتا نیام اٹ خڑک انا تعلقداری ءِ سوگو کننگ کن تینا خیال آتا درشانی ءِ کننگے۔