حضرت نوح ؑآن حضرت ابراہیم ؑاسکان  2

ہرفے او ہم وا تفر ءِ مون کرے بت خانہ غا

او بُت آتے کُل ءِ پِرغا بس تینا جاگہ غا

خواہفے نمرود اودے ِتس دَھڑکو بے شمار

اِلّے نی ہیت آتے ہندا چُپ مرک نی بے توار

نی کنے مَنّہ بُت آتے رب مَنّہ چاسہ جوان

دود و رسم آک دا تفوک ءُ نن تون باوہ پیرہ غان

پارے ابراؑہیم اسٹ ءِ ذات باری رب ننا

او سلامتی تروک آ او کروک ءِ ہم فنا

نی غلط اُس نا غلط ءِ فکر و سوچ و ہم خیال

رب ءِ اتپہ خار اٹی نی او نا بڑزا ءِ جلال

ٹیٹُک اس خلک پارے نمرود نے تو ہندن ای کروٹ

تپرہ بس نا خدا ءِ، خاخر اٹ بس نے ہُشوٹ

ایس ڈوہا پاٹ پارہ بے حساب او شش تُو اٹ

ابراہیم ؑ ءِ نن ہُشونک ولدا ہندا خاخر اٹ

لگّا خاخر او دَم آ تو کس ءِ اِلیتو رہ اٹ

شیطان اوڑے بس رسینگا بٹبو اودے دا وڑ اٹ

مُرّ آ ابراہیم ؑ کہ داسہ نم جلونٹ اس جوڑ کبو

اودے تِخبو داٹی ولدا نم جلونٹ اس ایتبو

تمِک ہندن خاخر اٹ او لگفوک آ چار اٹی

نم خنورے اودے ہندن او ہُشنگو وار اٹی

ہیت ءِ شیطان نا پدا ہلک اوڑتون داوڑ دن کرے

خاخر اٹ نمرود چغل تس دا وڑ اٹ پیغمبرؑ ءِ

حکم تسک خاخر ءِ رب دا وڑ اٹ نی مر پُدین

رحمت آتے ابراہیم ؑ کن دا وڑ اٹ نے آ دَسِین

یخ داخس نی مفیسک ابراہیم ءِ یخ کرو

بس سلامتی نا کچّ آ نا پُدینی ہم مرو

دُن پدا خاخر خلیل ؑ کِن او دم آ گلزار مس

مَس ذلیل شیطان ولدا اوڑے نمرود خوار مس