طالب علم یونین آتا ورناتیٹی راہشونکی لائخی تے مونی دننگ اٹ کڑد اہم ءِ،پروفیسر احسن اقبال

گچین کارکڑد نشان ترفنگ کن جامعہ غاک بایدے قومی کہول انا جماعتی سیاست آن بایدے آجومریر

0

Get real time updates directly on you device, subscribe now.

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ طالب علم یونین آک ورناتیٹی راہشونکی لائخی تے مونی دننگ اٹ اہم ءُ کڑد اس ادا کیرہ ولے جامعہ غاک قومی کہول انا جماعتی سیاست آن بایدے آجومریر تانکہ طالب علم آک تعلیمی چاگڑد ء زہمی کننگ آ بیدس تینا سرکڑدہ و نمائندہ لائخی تے مونی دننگ کیر۔ داخیال آتا درشانی ءِ او ریگالیاہوٹل اسلام آباد اٹی اڈ ہلوک قومی گپ وتران تعلیم نا وخت آ”سیاسی برادری و تعلیم“ نا سرحال آ پینل شرہ نا بشخ ہلوک آتیان تران اٹی کرے۔ شرہ ٹی تعلیمی اصلاحات، طالب علم آتا راہشونکی لائخی، سیاسی بشخ ہلنگ و پاکستان نا تعلیمی نظام نا آخبت آ گپ وتران کننگا۔ سرکڑدہ غاتا ردوم اٹ تعلیم نا کڑد آ گپ وتران کرسا پروفیسر احسن اقبال داہیت آ زور شاغا کہ طالب علم یونین آک ورناتیٹی راہشونکی لائخی تے مونی دننگ اٹ اہم ءُ کڑد اس ادا کیرہ۔ تینا جندی آزموندہ نا حوالہ ءِ ترسا اوپارے کہ طالب علم یونین و طالب علم سیاست اٹی بشخ ہلنگ اوفتا راہشونکی لائخی تا ردوم اٹ نمان کڑد ادا کرے۔ بنجائی وزیر طالب علم یونین آتا بحالی آ زور شاغسا اوفتا بحالی کن اولسر جاچ انا درخواست دائر کننگ نا سلاہ تس‘ولے اوپیدوار کرے کہ جامعہ غاک قومی کہول انا جماعتی سیاست نا زہم تیان بایدے آجو مریر تانکہ طالب علم تعلیمی چاگڑد ءِ زہمی کننگ آن بیدس تینا راہشونکی و نمائندہ لائخی تے مونی دننگ کیر۔ تعلیم نا بشخ اٹی زیات زرکاری نا گرج آ ہیت کرسا پروفیسر احسن اقبال تعلیمی بجٹ اٹی ودکی آ زور شاغا و صوبائی حکومت آتیان خواست کرے کہ او خاص وڑ اٹ مرمرانگا و پدتموک علاقہ غاتیٹی تعلیمی اصلاحات آتے اولیت ایتر۔ اوعلاقائی فرق ءِ کم کننگ کن تعلیمی انفراسٹرکچر، ادارہ ئی آسراتی و آب اٹ تعلیم اسکان رسینگ ءِ گچین جوڑ کننگ نا اہمیت آ زور شاغا۔ پروفیسر احسن اقبال پارے کہ اے آئی نا دور اٹی مون آ بروک چیلنج و خواست آتا رداٹ تعلیمی نصاب اٹی جوان اصلاحات و اودے پوسکن وڑتیا کننگ المی ءِ۔

Get real time updates directly on you device, subscribe now.

Leave A Reply

Your email address will not be published.