متکن آ جھیڑہ غاتے اقوام متحدہ نا قرارداد آتا رداٹ ایسر کننگے،خواجہ محمد آصف

پاکستان جہانی کہول آ انسانیت نا شرف، انصاف و مدامگی امن نا مونی دننگ کن تینا مثبت کڑد ءِ ادا کرساکیک

0

Get real time updates directly on you device, subscribe now.

برسلز/اسلام آباد، بنجائی وزیر دفاع خواجہ محمد آصف جہانی امن کن اجتماعی شعور، اسیجائی لائحہ عمل و تین پہ تینی کمکاری آ تالان سلامتی پالیسی ءِ المی گوندسا پارینے کہ متکن آ جھیڑہ غاتا جہانی کانود و اقوام متحدہ نا قرارداد آتا رداٹ ایسر المی ءِ، پاکستان جہانی کہول آ انسانیت نا شرف، انصاف و مدامگی امن نا مونی دننگ کن تینا مثبت کڑد ءِ ادا کرساکیک۔ اوداہیت ءِ یورپی پارلیمنٹ برسلز اٹی ”شومان سیکورٹی اینڈ ڈیفنس فورم“ آن تران کرسا کرے۔ پنچ شنبے نادے آ وزارت دفاع غان جاری بیان نا رداٹ خواجہ محمد آصف پارے کہ جہانی امن، سلامتی و اقوام متحدہ نا امن مشن تیٹی پاکستان نا متحرک کڑد جہانی کہول آ قربانی و شانی آ خذمت آتا روشنا درور ءِ۔ اوپارے کہ تدوک آ ہفت دہائی تیٹی اقوام متحدہ نا 48 امن مشن تیٹی 2 لکھ 37 ہزار پاکستانی کارندہ خذمت سرتسنو وخت اس کہ جہانی امن کن 183 پاکستانی کارندہ تینا جان تے ندر کریر۔ خواجہ محمد آصف خبڑدار کرے کہ جھیڑہ غاتا گواچی علاقہ غاتیٹی اقوام متحدہ نا امن مشن تیٹی اناگت کمتی انسانی سلامتی نا خطرہ غاتے پین ودفنگ کیک۔ اوامن مشن تا مینڈیٹ ءِ حقیقت پسندانہ، وسیلہ غاتیان شپ و مریس وختی سیاسی ایسری تون ہم گرنچ مننگ نا گرج آ ہیت کرسا پارے کہ دا وڑ انا مینڈیٹ نا جوڑ کننگ اٹ فوجی و پولیس دستہ فراوان کروک آ ملک آتے گچین نمائندگی بایدے ملے۔ وزیر دفاع پارے کہ امن بیرہ جنگ مفننگ نا پن اف بلکن مدامگی سوگوی کن انسانی سلامتی ءِ اولیت تروئی مریک۔ اوپارے کہ موسمیاتی بدلی، غذائی بے رکھی و زرگزرانی نزوری جہانی جھیڑہ غاتے پین ودفنگ اٹی ءِ، پاکستان تینٹ موسمیاتی بدلی نا خطرہ غاتیان دراست زہمی مروک آ ملک آتیٹی اوار ءِ۔ وزیردفاع پارے کہ جھیڑہ غاتا علاقہ غاتیٹی بے اڑاند انسانی کمک نا فراوانی و موسمیاتی و شونداری قول آتا پوروی المی ءِ۔ خواجہ محمد آصف دا ارادگی نا درشانی ءِ کرے کہ پاکستان جوان و گچین کثیر الجہتی جہانی نظام کن پول انا کڑد ادا کننگ کن تیار ءِ و جہانی کہول آ انسانیت نا شرف، انصاف و مدامگیامن نا مونی دننگ کن تینا مثبت کڑد ءِ ادا کرسا کیک۔

Get real time updates directly on you device, subscribe now.

Leave A Reply

Your email address will not be published.