خضدار اٹ غلط پارکنگ و ودیکاری نا چٹفنگ کن دمدستی گام گیج کننگے،محمدبلوچ
پولیس و پوریاگر برادری نا کمک اٹ شار اٹی امن ایمنی و ٹریفک نا روانی کن اسیجائی کوشست کننگک
خضدار شار نا رونق آتے بحال کننگ و ٹریفک نظام ءِ گچین جوڑ کننگ کن ایس ایس پی خضدار محمد بلوچ پڑ آبس‘ ایس ایس پی خضدار محمد بلوچ انجمن تاجران خضدار نا صدر حافظ حمیداللہ مینگل و پولیس کارندہ غاتتون اوار تدوک آ دے خضدار شار انا چندی پوائنٹ آتادورہ ءِ کرے‘ داوخت آ او جتاجتا چوک آتیا پیادہ واک کرسا ٹریفک نا نظام و ٹریفک پولیس نا کارکڑد نا جاچ ءِ ہلک۔ دا وخت آ ایس ایس پی خضدار ٹریفک کارندہ غاتے پارت کرے کہ شار انا رش والا چوک آتیا ٹریفک نا روانی ءِ امر کہ مرے پک کننگے، غلط پارکنگ و ودیکاری تے چٹفنگ کن دمدستی گام گیج کننگے تاکہ الس و پوریاگر آتے ہچ وڑ انا فریشانی مون تروئی تمپ۔ داوخت آ انجمن تاجران خضدار نا صدر حافظ حمیداللہ مینگل ایس ایس پی خضدار نا گام گیج آتا ستاءِ کرسا پارے کہ پولیس و پوریاگر برادری نا کمکاری اٹ شار اٹی امن ایمنی و ٹریفک نا جوانی کن اسیجائی کوشست آک برجا سلرہ۔ ایس ایس پی خضدار محمد بلوچ پارے کہ ٹریفک ءِ کنٹرول کننگ کن پوسکنوڑ نظام اتنگ انگ ءِ، ہراڑان شار اٹی ٹریفک جام انا ویل مدامگی بنداو تیا ایسر مریک و شاری تے آسراتی رسینگک‘ او پارے کہ خضدار پولیس الس نا خذمت و شار انا زیبائی و رونق ءِ بحال تخنگ کن سنبرینگوک ءِ۔