قدرتی آفت آتا زہمی تے وخت آ ریلیف فراوانی ءِ پک کننگک،ڈپٹی کمشنر گوادر
وزیر اعلیٰ میر سرفراز بگٹی نا وژن و حکومت بلوچستان نا پالیسی نا رد اٹ زہمی تتون کمک کننگک،دیوان نا وخت آ گپ و تران
گوادر / پسنی، وزیراعلیٰ بلوچستان میر سرفراز بگٹی نا وژن و حکومتِ بلوچستان نا پالیسی نا رد اٹ قدرتی آفت و سخت حالیت آتیان زہمی مروک خاہوت آتے وخت آ ریلیف نا فراوانی ءِ پک کننگ کن ڈپٹی کمشنر گوادر نقیب اللہ کاکڑ نا خصوصی پارت آ اسسٹنٹ کمشنر پسنی عبدالکریم بگٹی تحصیلدار پسنی عبدالرحمان تون اوار شادیکور، زہرین کہور و گورستانی نا چندی علاقہ غاتیان امپوک سد آ زہمی خاہوت آتیٹی پی ڈی ایم اے نا کنڈ آن فراوان کروک کمکی گڑاتے بشخ وپانٹ کرے‘ حوال نارد اٹ ہندا علاقہ غاتیان امپوک زہمی خاہوت آک ڈوسی، سالاچ و کہدہ لطیف گوٹھ اٹی وختی وڑ اٹ ہندی مسنو‘ ہراڑے ضلعی انتظامیہ نا کنڈ آن اوفتے اُرائی کاریم اٹ اتنگ نا المی گڑا و ایلو کمکی گڑاتے فراوان کننگا تاکہ سخت حالیت آتیٹی اوفتا بنداوی گرج آتے پورو کننگ و خواری تے کم کننگ اٹی کمک رسینگے‘ دا وخت آ اسسٹنٹ کمشنر پسنی و تحصیلدار پسنی زہمی خاہوت آتتون اوڑدہی کریر، اوفتا ویل و گرج آتے معلوم کریر و اوفتے باور کرفیر کہ ضلعی انتظامیہ دا سخت انگا سات اٹی اوفتے تنیا الیپک و اوفتا کمک، بنداوی گرج آتا فراوانی و بحالی کن کل دوئی وسیلہ غاتے کاریم اٹ اتیک۔ ڈپٹی کمشنر گوادر نقیب اللہ کاکڑ نا کنڈ آن زہمی خاہوت آتا خواری تے دمدستی چٹفنگ و ریلیف سرجز آتا پدریسہ چاروکی کن کروک گام گیج ضلعی انتظامیہ نا السی خذمت، احساسِ زمواری و سخت وخت اٹی شاری تتون اوار سلنگ نا ارادگی نا درشانی ءِ‘ اونا خصوصی پارت آ ضلعی و تحصیل انتظامیہ زہمی تے کمک نا فراوانی و اوفتا گرج آتے پورو کننگ کن متحرک ءِ۔