کوئٹہ نا انتظامی ونڈ و دے ٹِکی دیکی ضلع غاتا حد بندی نا باندات بھاز اہم ءِ،عبدالرحمان رفیق

0

Get real time updates directly on you device, subscribe now.

کوئٹہ، جمعیت علماء اسلام ضلع کوئٹہ نا مجلسِ عاملہ نا اہم ءُ دیوان اس ضلعی امیر مولانا عبدالرحمن رفیق نا کماشی ٹی اڈ ہلک، ہراٹی ایلو جماعتی و السی باندات آتتون اوار کوئٹہ ءِ دے ٹِکی و دیکی اِرا انتظامی ضلع ٹی بشخنگ نا حکومتی فیصلہ نا جم جاچ ءِ ہلنگا۔ دیوان اٹ ضلعی جنرل سیکرٹری حاجی عین اللہ شمس نا چاروکی ٹی جوڑ کمیٹی تینا سلاہ و گڑتی تے پیش کرسا پارے کہ کوئٹہ نا انتظامی بشخ و پانٹ و دے ٹِکی و دیکی ضلع غاتا حد بندی نا باندات بھاز اہم ءِ ہندا سوب آن ہر وڑ انا حد بندی، حلقہ بندی یا انتظامی بشخ و پانٹ آن مست کل سیاسی جماعت، قبائلی متبر، مسکوہی بلدیاتی نمائندہ و ایلو تعلقدار اسٹیک ہولڈر آتے سلاہ اٹ ہلنگ المی ءِ، اوفتا بھرمی سلابت و امنائی آن بیدس ہچ وڑ انا حد بندی نا موکل تننگ مفک‘ کوئٹہ بلوچستان نا بنجائی شار و سیاسی، زرگزرانی، واپاری و راجی سرجز آتا وت ءِ، ہندا سوب آن اونا آخبت تون تعلقدار فیصلہ غاتے سرکاری افسر یا فارم 47 نا مخصوص نمائندہ غاتا سلاہ تا جاگہ غا السی سلابت اٹ کننگے‘ دیوان پیدوار کرے کہ جمعیت علماء اسلام انتظامی جوانی و الس ءِ اوفتا درگہ غا آسراتی تا فراوانی نا مخالف اف۔ ولے انتظامی اصلاحات نا پن آ آبادی نا کچ‘ جغرافیائی راستکی‘ تاریخی و راجی تعلقداری۔ وسیلہ و السی فائدہ غاتے گوجالنگ ہچ گہس امنا کننگ مفک۔ کوئٹہ ایسٹ و کوئٹہ ویسٹ انا بشخ و پانٹ اٹی آبادی، رقبہ، وسیلہ، شونداری بجٹ، تعلیمی و طبی آسراتی و ایلو بنداوی گرج آتا انصاف و شفاف پک کننگ المی ءِ تاکہ اسہ علاقہ اس ہم محرومی نا گواچی مفک‘ دیوان حکومت آن خواست کرے کہ کل سیاسی جماعت و تعلقدار اسٹیک ہولڈر آتیا تالان واکدار کمیٹی ٹہیفسا انتظامی بشخ و پانٹ، دے ٹِکی و دیکی دنگ و حلقہ بندی تا کل پالو تا اول سر جاچ ہلنگے و امنائی آن بیدس ہچ ءُ پک فیصلہ اس بیٹ کننگپ۔ جمعیت علماء اسلام ضلع کوئٹہ السی حق، شاری فائدہ و انصاف آ تالان انتظامی نظام نا رکھ اکن تینا آئینی، جمہوری و سیاسی کڑد ءِ بھرمی وڑ اٹ ادا کرسا کیک۔

Get real time updates directly on you device, subscribe now.

Leave A Reply

Your email address will not be published.